Shillong, Nailur 26: Ka Joint Action Committee To Oppose Power Franchise, Ri Bhoi District, hynne ka sngi kala ai da ka dorkhas ha u Symbud Myntri Rangbah ba khmih ia ka tnad Bording Bah Prestone Tynsong, ba pynpaw ia ka jingpyrshah kaba jur ban aiti ha ki riewshimet ne kompani ban pyniaid iaka MeECL Umsning Division namar kam shim la don kano kano ka jingpynsngewthuh iaki paidbah ka thaiñ halor kane ka bynta.
Ki nongialam ka JAC kiba kynthup ia ka Khasi Students’ Union (KSU), Hynniewtrep National Youth Front (HNYF), Federation of Khasi Jaintia and Garo People (FKJGP) bad Ka Synjuk Ki Rangbah Shnong, Ri Bhoi ha ka jingiakynduh ia u Bah Prestone Tynsong kila pynpaw ba ki pyrshah jur iaka jingpynbna paidbah ne Notification halor ka jingaiti ha ki riewshimet ne kompani ban pyniaid iaka MeECL Umsning Division.
“Ngi la ioh iaka jingujor na ki nongshong shnong ka Umsning halor ka jingpynmih iaka Notification ban aiti iaka Umsning Sub Division jongka MeECL sha ka kompani shimet. Ngi la iashong jingialang hapdeng ki nongshong shnong, ki nongialam shnong bad ki sengbhalang bad ngi la rai ba khlem kano kano ka jingpynshai ia u paidbah ne iaki nongialam shnong, ngin ym pdiang ia kane ka jingthmu jong ka MeECL” ong u Bah Ferdinlad Kharkamni, President ka KSU-North Khasi Hills.
U la ong, kila don ki jingjia mynshwa ha Mawkyrwat, Mawsynram bad rilum Garo ha kaba ki paidbha kila khmih lynti ba ka jingai jingshakri kan dang bha da ka jingai pyniaid sha ki kompani shimet hynrei kala don pynban ka jinglip bording elektrik kaba khah khah, katba ha Dadengre na ka jingai jingshakri kaba bha kala poi pynban sha kaba sniew shuh shuh.
“U Bah Prestone ula ai ka jingkular ban pysangeh noh shwa ia katei ka jingthmu bad yn pyntreikam iaka tad haduh ban da la dep ban ai jingpynshai bad jingpynsngewthuh ia ki paidbah lyngba ki dorbar shnong. Ngi na ka JAC ruh ngin ialeh ban buddien halor kane” ula ong.
“Ka jingaiti ha ka kompani shimet ia ki Sub Station naduh ka jingsam ia ka bording haduh ka jinglum iaka bai bording kan long kaei kaei kaba eh khamtam eh ha kaban pynbiang ia ka bording kaba thikna. Haduh mynta, ka bording ba ngi ioh ka dei kaba wan ka Stage-I, II, III bad IV bad kan buh jingeh ha ka por lyiur ba jur u slap, ka lyer kiba lam sha ki jingdkut jong ki sainar” ula bynrap.
Haba pyntip ba ka JAC kala kyntu ia u Bah Prestone ba yn pynbha shwa ia ki Sub Station bad ban kyntiew noh naka 11 KV shaduh ka 132 KV bad ban ai jingpynshai ruh ia ki paidbah ha kaba iadei bad ka Smart Billing bad Smart Meter, u Bah Ferdinald ula ong “Donkam ban pynsngewthuh ia ki paidbah halor ka jingioh jingmyntoi bad ia ki jingduhnong bad ka rai kan shong ha ki paidbah la ka long kaba biang ne em ban pyntreikam ia ka jingaiwai”.
U la ong ka jingthmu ka sorkar ban aiti ha ki kompani shimet ban pyniaid iaki Sub Station kadei namar ka jingduna ban iohlum iaka bai bording elektrik na ki paidbah.
“Napoh Ri Bhoi District hi ngim pat ju shem ba ki paidbah nongshong shnong kim ju siew iaka bording elektrik haba peit ia ki jingthoh jingtar kiba rim hynrei ki kham bun ha rilum Garo ki bym ju siew thikna iaka bai bording” ula ong.
“Lada ngi siew thikna iaka bai bording bad la aiti noh ha ki karkhana shimet kan buh haka jingeh ia ki nongpyndonkam iaka bording kiba don ha ka thaiñ nongkyndong namar ka jingiakren bad ka jingpyniaid da ki kompani shimet kan kham iapher ban iaki nongtrei ka MeECL kiba dei ki trai ri ne trai shnong” ong u bah Ferdinald.
