Shillong, Naiwieng 08: Ka seng Hynniewtrep National Youth Front (HNYM) hynne ka sngi ka la aiti daka dorkhas sha u Myntri Rangbah ka jylla u Conrad K Sangma, ka ba dawa ban thaw ia ka polisi thungkam ba 80% iaki samla trai jylla ha ki kompeni shimet hapoh ka jylla Meghalaya.
Haba kren sha ki lad pathai khubor u Joint Secretary ka HNYM bah Wyraiwan Sohtun u la ong ba ka jylla mynta ka kynti ka mad iaka jingduna ka ioh kam ioh jam ki samla bad kane ka buh jingeh iaki longing ba duna ha ka ioh ka kot.
U la kynnoh ba ka sorkar jylla haduh mynta kam shym la wanrah ia ki polisi ban kyntiew iaka ioh kam ioh jam bad kane ka pynduh mynsiem iaki samla khamtam kito kiba la pyndep iakI eksamin bapher bapher.
“Khlem ka lad ioh kam ioh jam ki samla ka jylla kim don ka lawei bad kane ka pynsat iaki bad dei namar kane ka seng ka dawa na ka sorkar jylla ban thaw daka polisi ban thep kam haduh 80% iaki samla trai jylla ha ki kompeni riew shimet kiba don ha kylleng ka jylla Meghalaya” la ong u bah Wyraiwan.
U bah Wyraiwan u la ong ba ka lad ioh kam ioh jam hapoh ki kompeni shimet ka bun bha bad dei namar kane kiwei ki sorkar jylla kum ka jylla Haryana, Andhra Pradesh, Karnataka, Madhya Pradesh bad Maharashtra kila pyntreikam ia ka policy ba haduh 70 haduh 80 percent la thepkam iala ki trai jylla ha ki kompeni shimet.
Haba kylli, u President ka HNYM ubah Louis Dohtdong u la ong ba u Myntri Rangbah ka jylla um shym la kular eiei hynrei u la pynpaw ba ia kane ka mat yn hap ban rah sha ka jingialang ka kynhun Myntri Sorkar ban iathir bad ban ioh jingmut lang na baroh.
