Shillong, Iaiong 26 : U Myntri ka Tnad bording Abu Taher Mondal hynne ka sngi Balang ula ong ba kan nym don satia ka jingpynjynsur na ka jingpynlip bording tad haduh ba ka Jylla kan ioh ia ka bording na ka Power Grid.
“Ka jingpynlip bording kan iai nang iai bteng tad haduh ba ngin da ioh bording na ka grid” ong u Mondal haba iakren bad ki nongthoh khubor.
Hynrei ula kular ba ka Sorkar kala shim ia ki sienjam ban lah weng noh ia kane ka jingeh haba pynpaw “Ngi la shim ia baroh ki sienjam kiba lah ban shim ban peit ia ka jingpynduna noh ia ki kynta pynlip bording”.
U Myntri ula ong ba ka Sorkar Jylla kam don pisa satia ban thied bording ha ka dor kaba rem. “ Ngi lah ban thied (bording) tang hapoh u pud. Ngim lah ban iaid palat ia kata lem kumta ngin buh ialade ha ka jingkyrduh pisa” ula bynrap.
Haba kylli, u Mondal ula ong ba kane ka jinglong jingman kam don bynta eiei bad ka Sorkar bala leit noh hynrei ka daw hi ka dei namar ka jingbym pat hap u slap kumba long ha kiwei ki snem ha kaba ka Jylla ka ju ioh ia u snem naduh u bnai Rymphang-Lber.
“Mynta ka kynti ngi don ha ka khep kaba khyllah bha. Watla ki Jylla ba marjan kila ioh slap hynrei tang ma ngi, ngim shym la ioh slap. Tang hynnin ka sngi ba ngi ioh katto katne u slap hynrei kane kam iarap satia ia ka jinglong jingman ba mynta” ula bynrap.
U Mondal ula ong ba ka jingkhang jong ki power prokect kum ka Kopili Stage-I ba pynmih 200 MW kaba ka Jylla ka ju ioh 35 MW kum ka bhah, ka Khandong Power Station ba 50 MW (ka bhah ka Jylla ba 8.51 MW) bad ka Kopili Stage-II ba 25 MW (ka bhah ka Jylla ba 3.45 MW) kala ktah jur ia ka Jylla Meghalaya.
Ula pyntip ruh ba wat ka Leshka Power Project kala khangdam namar ka jingbym don um.
U Myntri ula pyntip ruh ba ula lum jingialang halor ka jingdon um hapoh ka pung Umiam bad maham “Ngi lah ban hap khang ia ki power project lada ka um ka dang tyrkhong ha kane ka pung”.
