Shillong, Risaw 26 : U Myntri Rangbah ka Jylla Conrad K Sangma hynne ka sngi ula ong ba ka Sorkar Jylla kan pyrshang katba don ki lynti ban pynthikna ba ki Longiing ba shah ktah naka ‘eriong Sitrang kin ioh ia ki jingiarap.
Haba iakren bad ki nongthoh khubor, u Conrad ula iathuh ba ula dep shong bishar kam halor ka jinglong jingman ha ka jingialang bad baroh ki Deputy Commissioner na ki 12 tylli ki District ka Jylla.
“..ki Tnad khamtam ka Revenue and Disaster Management kila jam shakhmat ban pynthikna ba ki Longiing ba shah ktah kin ioh ia ki jingiarap bad baroh ki Deputy Commissioner kila trei palat ia ka por ban pynthikna ha kaban pynpoi ia ki mar bam kat kaba lah sha ki briew ba shah ktah” ula ong.
“Kawei pat ka kam ba shah ktah bha ka dei ka jingsam bording ha kylleng ki bynta jong ka Jylla. Ka MeECL kala trei palat ia ka por bad bun na ki lain kiba la dep ban maramot bad ia kito ki bym pat maramot pat la kyrmen ba yn lah ban pyndep noh hapoh ka 24 kynta ban wan” ula bynrap.
