Itanagar, Jylliew 20: U nongialehkai boxing na Arunachal Pradesh u ba dang 16 snem rta u la shah tep im na ka jingtwa khyndew hadien ka jingther u ‘lapbah hajan ka nongbah Itanagar ha kane ka step sngi U Blei ba la lah.
Kane ka jingjia ka la jia hapoh ka shnong Sood katba u dang don ha ka lynti ban leit iashim bynta ha ka boxing selection trial ha Itanagar. Ia une u khynnah la tip kyrteng kum u Rage Hilli,u ba dei u nongshong shnong jong ka shnong Keyak ha ka thain sepngi ka Siang district.
U Hilli ha ryngkat uwei pat u paralok jong u, ki dang don ha ka lynti ban leit sha Rajiv Gandhi University ha Rono Hills na Dokum Colony ka ba ha Itanagar da ka thuk thuk ban leit iashim bynta ha ka boxing selection trial hadien ba kane ka jingtwa khyndew ka la wan jia.
Katba u Hilli u la shah tep im, u paralok jong u, u Tai Abu u la lait im da ka said na kane ka jingjia ha ka ba u la ngat ha ka jingmynsaw ka ba malu mala. Hadien la lap ia ka met iap jong utei u khynnah da ki bor pulit ha ryngkat ka jingiarap da ki trai shnong.
Na ka liang u myntri rangbah ka jylla u Pema Khandu u la pynpaw ka jingsngewlem halor kane ka jingkhlad noh jong une u khynnah.
Lyngba ka twitter u Khandu u la ong; “Ka long ka jingsngewsih ka ba khraw halor ka jingduh noh ia une u khynnah u ba dang pule ha ka klas IX bad u ba dang ialeh ban kiew sha ka thong ha ka jingialehkai boxing, bad u ba don ruh ka jingphohsniew ban pyniasoh sha ka tnat shipai jong ka ri. Ka jingsngewlem ka leit sha ki ba haiing hasem jong u.”
