Shillong, Naiwieng 12 : Ki nongshong dukan ha Mawlonghat, kila pynlong ia ka jingiakhih ha ka sngi Palei ban pynpaw ia ka jingpyrshah halor ka jingtyrwa ban pynkynriah noh ia ka lynti iaid kamai ki bos na ka thain, haba maham ba kane kan ktah jur ia ka kamai ka kajih jong ki bad pynthut ia ka die ka thied ha ka thain.
Kane ka jingiakhih kala mih hapdeng ka jingsangeh kamai ki nongniah bos naduh ka sngi Balang ban pyrshah ia ka jingthmu ka Sorkar ban pynkynriah ia ka jaka pynieng ki bos sha ka Parking Lot ba don marjan ka Anjali Cinema Hall.
Ki nongdie dukan kila pynpaw ba ka die ka thied jong ki ka shong eh ha ka jingiaid kamai ki bus bad ki passenger ha Mawlonghat la palat san phew snem mynta. Kila pynpaw ba ka jingpynkynriah ia ka lynti iaid kamai ki bos kan ktah ym tang ia ki nongshong dukan hynrei ia ki nongrep, ki nongkhaii bad kiwei kiwei kiba shaniah ia ka jingiaid kamai ki bos.
Uwei u nongshong dukan ba iakhih, ula ong ba ka Sorkar kala buh ia ka 12 tarik Naiwieng kum ka sngi ba khatduh ban pynkynriah ia ki jaka ieng bos bad thmu ban bujli ia ka jaka ieng bos sha ka jaka shong dukan madan.
“Ngim kwah ban mih noh nangne” ula ong haba bynrap ba ka jaka ieng bos kala treikam ha kane ka thain la palat 50 snem.
Ula ong ba ki nongshong dukan kila pynroi ia ka kamai ka kajih jong ki na ka jingiaid kamai ba man ka sngi jong ki bus bad ki passenger, bad kano kano ka jingpynkynriah kan ktah beit beit ia ka die ka thied jong ki.
Ki nongshong dukan madan kila dawa ia ka jingialang bad ka Sorkar Jylla na ka bynta ban iakren ia kane ka kam, haba pynpaw ba kin nym pynlait satia ia kane ka jaka khlem ka jingiasyllok kaba thikna.
“Lada ka Sorkar ka kwah ban pynbor iangi, Ngi, kum ki riew paidbah, ngi don ka hok ban iakhun iala ka jong ka hok” ong ki nongiakhih haba maham ban nang pynjur ia ka jingiakhih lada pynkynriah ia ka jaka ieng bos khlem ka jingiakren.
