Shillong, Naiwieng 11 : U MP barim ka Rajya Sabha Dr Wanweiroy Kharlukhi ha ka sngi Ba-ar, ula thalain da kaba tyngeh ia ka Voice of the People Party (VPP), haba kyntu ia ki paidbah ka ri-lum Jaintia ba kin kyntait ia kane ka partu namar ka jingkynnoh ba kwah pynjah ia ka kyrteng ‘Jaintia’ bad ba pynshlur ia ki nongthep vote ban pdiang ia ka pisa ha ka por elekshon.
U Dr Kharlukhi ula kren ia kane na ka rynsan ialap elekshon ha Sutnga, East Jaintia Hills ban kyrshan ia u kyrtong ka Congress Bah Vincent H Pala, u ban iakhun ia ka elekshon shiteng samoi ka Shillong Lok Sabha.
Haba pynpaw ia ka jinglong ba kyrpang ka Sutnga, u Dr Kharlukhi ula ong ba jingthmu jong ka VPP kalong ban wanrah ia ka jingiapait iapra bad ka jingniewbein ia ka jinglong ba kyrpang ki Jaintia.
“Na Sutnga, la kha ia u syiem Jaintia bad ula synshar ia ka Hima Jaintia. Hadien ba ngi ioh ia ka Autonomous District Council, la tip ia ka kum ka United Khasi-Jaintia Hills. Hynrei ngam tip ia kaei ka daw ba ka Prah (VPP) ka kwah ban pynduh noh ia ka kyrteng ‘Jaintia’” ula ong.
“Sngewbha kynmaw, ka Hima Jaintia ka wan na ka shnong Sutnga. Kumta, ngi ba dang tuid da ka snam bad ka jingieid ia ka ri-lum Jaintia, ngim dei ban ailad ia kane ba kan urlong. Ngi dei ban wanrah iaka jingiatylli hapdeng ka Jaidbynriew jong ngi, ym ban pyniapait iapra. Kumta, sngewbha pyrkhat bha shuwa ban shim ia ka rai” ula bynrap.
Ula ong ba ka jingpyrshang ban weng ia ka kyrteng ‘Jaintia’ kam dei tang ka slogan sain pyrthei hynrei ka jingthombor ia ka histori, ka jinglong ba kyrpang bad ka burom jong ki paid Jaintia.
U Dr Kharlukhi ula ther ruh ia ka VPP halor ka jingkynnoh ba ka ai jingmut ia ki nongthep vote ba kin shim ia ka pisa hynrei ban nym ai vote ha ka por elekshon, haba kynnoh ia ki nongialam ba ki sngew khuid baddon akor eh, katba pynshlur ia ki briew ban leh ia ka kam thok.
“Ha social media, ki briew kiba kam ialade kum ki riewkhuid, hynrei ki kam jong ki pat ki long kum ka lynti sha ka dujok” ula kynthoh.
“Hynrei nga ong ha phi, kam dei kaba bha ban shim pisa. Lada phi shim pisa hynrei phim thep ïa ka vote jong phi, phi long u nonglamler. Lada phi shim ïa ka pisa, phi dei ruh ban ai ïa ka vote jong phi sha uta uba ai ïa kata ka pisa,” u la bynrap.
Ula ong ba ka party kaba pynshlur ban shim pisa, kam dei ban kam ba kan pynkhuid ia ka sain pyrthei.
Haba jubab halor ki jingkynnoh bamsap pyrshah ïa u, u Dr.Kharlukhi u la kop hakhmat u paidbah, da kaba ong ba u long uba la kloi ban iehnoh ïa ka saiñ pyrthei lane wat ban leit phatok ruh, lada lap ba u donkti ha kano kano ka jingpyndonkam bakla ïa ka bor lane ka pisa.
