Shillong, Naiwieng 11 : Dang tang san snem bala pynkha ia ka, ka Eastern West Khasi Hills kala don ha ka lynti kaba dei bad don ia ka lawei kaba kham phyrnai, ong u Symbud Myntri Rangbah Bah Sniawbhalang Dhar ha ka sngi Ba-ar.
Haba kren ha ka jingrakhe dap san snem jong ka District ha Mairang ha ka jingiadonlang u MLA ka thain bad President ka UDP Bah Metbah Lyngdoh, u Bah Sniawbha ula ong ba ka District kala jan long ka district ba pura, da ka jingsah satang katto katne ki tnad ban pynkha.
“Kila treikam bha, hynrei…Ngam lah ban ong ba lah dep ai lut ia baroh ki tnad, hynrei watla katta kala jan long pura. Ki dang don satang katto katne kiba donkam ban hap wanrah” ula ong.
U Bah Sniawbha ula iathuh ba u Bah Metbah ula kren ia ki jingdonkamba dang sah jong ka district beit beit bad u Myntri Rangbah Conrad K Sangma, uba la mynjur ba ym lah ban leh shisien leh ia kiei kiei baroh.
“Nga ai khublei ia u Bah Metbah Lyngdoh. Ngi dang shu iashong lang bad u Myntri Rangbah, bad ula pynsngew ia kijuh ki jingdonkam bad u Myntri Rangbah ula shim jingthoh bad ong ba hapoh ka san snem, kam long kaba suk ia nga ban leh shisien leh ia kiei kiei baroh, hynrei nga sngewthuh ia ka jingdonkam ki paidbah ka District” ula ong.
Haba pynkynmaw ia ki snem ba u don ha Mairang, u Bah Sniawbha ula ong ba ki jingkylla kila paw mynta ha baroh.
“Nga dang dei tang u contractor. Nga la sah hangne. Ha katei ka por, Nga la jan long kum u nongshongshnong ka Mairang. Wat haba wan sha ka thain, Nga kynmaw ia ki jingtei ba don ha ka thain-Lada ngi peit ia ki Ophis, ki surok, ki jingtei-ki dei ki Ophis Sorkar, bad lada ngi peit mynta, shibun kiei kiei kila kylla” ula ong.
Ula ai jingiaroh ia u Bah Metbah, MLA barim ka Mawthadraishan Bah Brolding Nongsiej bad ki MDC kiba la tynruh khlem sangeh ia ka Sorkar MDA ban pynioh district.
U Bah Sniawbha ula ong ba ka jinglong pdeng ka Mairang, kaba pyniasoh ia ka Ri-Bhoi, East Khasi Hills bad West Khasi Hills, kala pynkhlain ia ka jingdawa ban ioh iala ka jong ka district, katba ka jingthaw ia ka Block kum ha Riangdo ka dei kaba thmu ban wanrah ia ka synshar khadar shajan jong u paidbah.
Halor ki kam ba sahteng, kynthup ka Ophis u DC, ula ong ba ki kot ki sla kila nang iaid ha ka jingpyn biang bad wer ia ka jingiatreilang ban pynsted ia ka kam.
U Bah Sniawbha ula pynkynmaw ia ka nam ka burom jong ka Mairang kum ka jaka jong u Tirot Sing bad ka Hima Nongkhlaw, da kaba ong ba ka histori jong ka jinglong shlur ki briew ka thain kala iai bteng ban ai mynsiem ia ka Jylla.
“Nga sngew sarong ba ka Hima Nongkhlaw bad ka Mairang ki la paw kyrteng, kumba long u riewkhraw na Jaintia, u Kiang Nangbah. Kine ki long ki kam kiba ai mynsiem ïa ngi,” u la ong.
Ula ong ba ka Sorkar MDA-I bad MDA-II kala kynshew pisa bha ha ki surok, ki jaka sumar, ki madan ialehkai bad ka kam sam bording bad pynbna ia 25,000 tylli ki tiar na ka bynta ki nongioh bynta ha ka kam pynroi sap.
