Shillong, Naiwieng 11: La palat 40 snem, ka Shillong kala don ha ka map jong ka rynsan iakob thei bhabriew bad ka Fashion Society Shillong kala pynkhreh ban pynlong ia ka 43rd Miss Shillong Supermodel Contest ha ka 21 tarik u Naiwieng ha Soso Tham Auditorium.
Haba pynbna ia kane ka jingiakob ha ka sngi Baar, u Chairman ka Fashion Society Shillong u Bah Aldous Mawlong ula ong, ba kane ka jingiakob kaba la sdang ha u snem 1983 kadei kaba la seng da ka jingiohi jngai ban kyntiew ia ka jingbhabriew bad jingpynitynnad bad kala bteng ban kylla long kum kawei na ki rynsan kiba pawnam jong ka nongbah na ka bynta ki samla kynthei.
“La seng ha u snem 1983, da ka jingthmu ban kyntiew ia ka jingbhabriew bad ka jingpynitynnad, ka Fashion Society Shillong kan pynlong ia ka Miss Shillong Supermodel 2026 Contest,” ong u Bah Mawlong.
Kin don 14 ngut ki nongiashimbynta ha kane ka jingiakob ban ia knieh ia ka khusnam ha ki 3 tylli ki kyrdan Traditional Fusion, Wings of Fantasy bad the Little Red Dress, ha kaba ka jingai ia ka khusnam kan long T.1 Lak, T.75,000 bad T.50,000 ryngkat bad 6 tylli ki khusnam synrop ne Subtitles.
Katei ka janmiet kan long kaba kham palat ban ia ka jingiakob thei bhabriew, ka
Adorylene Sawaia kaba na Shillong hi kan pynsngewtynnad ia ki nongpeitkai bad mynta ka kynhun kaba pawnam ka ‘Kawei Ka Sur Ensemble” kan pynshongshit ia ki paitbah da ki jingrwai kiba bun.
Ha kane ka jingiakob yn pyninam ruh ia ki jingsuh jaiñ kiba nalade hi bad kiba kham pher kiba la pynwandur da ka Fashion Department jong ka William Carey University kaban long ka jingleh kaba thymmai ha katei ka janmiet.
Kane ka jingiakob kan sdang ha ka por 4 baje janmiet. Ia ki Donor Cards lah ban ioh na Hotel Centrepoint, Shillong bad na ka jaka ha ka sngi ba pynlong ia katei ka jingiakob.
