Shillong, Naiwieng 10 : Ka jingsar ka VPP ia ka jingjop ha u 2024 kan ym jia shuh mynta, ong u President ka Meghalaya Pradesh Congress Committee Bah Vincent H Pala ha ka sngi Ba-ar, haba kynnoh ba ka Voice of the People Party (VPP) kala pynkhein ia ki jingkular bad pynsniew ia ka bhah thungkam thungkam jong ki paid Khasi bad Jaintia.
“Ka VPP kala hiar bha. Haduh katno kala hiar, ngin sa lah ban tip ynda la wan ka elekshon bad baroh kila rai iala ki kyrtong” ong u Bah Pala hadien ka jingialap elekshon jong ka elekshon shiteng samoi ka Shillong Lok Sabha, ba long ha Sutna,
“Nga la iohi kat shaba nga leit, wat ha Nongkrem, ha Mylliem, kiba bun ki briew kila ia sakma. Kiba bun kila duh jingkyrmen shibun eh, bun na kine ki briew kila kylla long ki nongtrei jong ngi ruh. Khlem pep, ka VPP kan nym ioh shuh ia ka vote kumba ka ioh hashuwa” ong u Bah Pala.
Une u MP barim ka Shillong ula ong ba ka VPP kala wan ha ka bor lyngba ki jingkular ban wanrah ia ka jingtreikam kaba khuid bad kaba shai, hynrei kam shym la lah ialade ruh ban im kumne. “La ka dei ka VPP ne ka BJP, ki dei ban bat iala ki jingkular. Ka VPP kala kular ia ki paidbah ba kan wanrah ia ka synsahr khadar kaba khuid bad ba shai, bad phi la iohi mynta ki khyrdop lum khajna ka KHADC kila nang mih nang mih. Kam shym don satia ka synshar khadar ba don ka jingkitkhlieh bad ka jingtrei kam kaba shai” ula ong.
Ula kdew ia ka jingkular ka VPP halor ka Trading Licence kum ka nuksa ia kaba u ong ba ka dei ka jingpynkhein ia ki kular. “Ki ong ba kin nym ai Trading Licence shuh, hynrei Nga la iohi dala ki jong ki khmat, ki briew kiba trei na ka bynta ka NEIGRIHMS, baroh baroh ki ioh Trading Licence” ong u Bah Pala haba bynrap “Kumta, kam don satia kano kano ka jingiapher, mynshuwa ka VPP kam don bad mynta ka VPP kala don”.
Une u Heh ka Congress ula ong ba ka jingshet kylla kaba khraw eh jong ka VPP ka dei halor ka ioh kam ioh kam bad ka State Reservation Policy.
“Ki bar jylla, kumba ju long, ha ki arsnem, katba ki jingkuklar ki iapher. Ka jingkyrmen jong u paidbah ka long ba kin (VPP) aikam aijam, hynrei kila nang pynsniew ia ka Reservation Policy, khamtam na ka bynta ka ri-lum Khasi bad Jaintia” ula ong.
“Kumta, baroh kiei kiei kila shah pynsniew lut, namar ba kila ai ka jingkular, kila kular, hynrei kim shym la bat pat ia ki” ula ong.
U Bah Pala ula ong ba ki nongthep vote, khamtam ki samla, kin ym shah pynbiej shuh. “Ki paidbah ka Meghalaya ki dei kiba stad, khamtam ki paidbah ka ri-lum Khasi bad Jaintia. Laiphew hynniew percent na ki nongthep vote ki dei ki samla bad ki samla ha kine ki sngi ki don ia baroh ki jingtip hala ki shympriah kti, la phi treikam hok lane phi bat iala ki jingkular” ula ong.
Haba kam ba ka jinglong jingman ha ka saiñ pyrthei ka la sdang ban kylla sha ka jingmyntoi jong ka Congress, u Pala u la bynrap, “Ka Congress ka la nang khlain nang khlain.”
