Shillong, Naiwieng 10 : U Myntri Sorbar bad MLA ka South Shillong Bah Sanbor Shullai ula khot ia ka jingialang ban iakren halor ka Shillong Ropeway Project ha Madan Laban.
Ia kane ka jingialang la khot pynlong da ka 19th South Shillong Advisory Committee, ka ban long la sngi Balang ha State Convention Centre, Cultural Hall, Shillong.
Kane kala mih hadien ba ka kynhun ki longkmie hapoh ka lama jong ka Joint Action Committee kila pynlong ia ka jingiakhih da kaba shong kyllain mungor ha Barik, haba dawa ia ka Sorkar ban pyndam lane pynkynriah noh ia ka project ha kine ki san sngi bala leit noh.
Ha ka shithi bala phah ha ka sngi Ba-ar, ka Committee kala ong ba ia kane ka jingialang yn pyniaid hi da u Bah Sanbor, uba dei u Chairman ka Committee, ban iakren halor ka jingpyntreikam ia ka project.
Kala kyntu ia baroh ki nongshah khot sngewbha ba kin ai lem ia ki jingai jingmut, ki ban sa aiti pat sha ka Sorkar Jylla.
Kiba shah khot ki kynthup ia ki Dorbar Shnong, Seng Longkmie bad Seng Samla ka Laban, Madan Riat Laban, Lumshatsngi Kench’s Trace, Kench’s Trace Oxford Rilbong, Kynjat Phutbol, Upper Lumpariang bad ka Lower Lumparing.
La khot ruh ia ka KSU Laban Circle, Seng Khasi Ri-Raid Laban, bad ka Joint Action Committee (JAC) Laban.
