Gangtok, Risaw 17 : U President ka Humro Sikkim Party (HSP) u Bhaichung Bhutia ula ong ba ka jingpyntreikam ia ka inner line permit (ILP) system hapoh kane ka jylla ka thain Himalaya kalong kaba donkam bha na ka bynta ka jingshngain jong ka ri.
U Bhaichung Bhutia ula ong ruh ba ka jingbym don ia ka ILP hapoh Sikkim kala nang pynjur shuh shuh ia ka jingwan rung beain da ki briew kiba na shabar hapoh kane ka jylla katba haduh ba ym lah shuh ban tehlakam.
Nalor kata ula ong ruh ba lada ym lah ban tehlakam ia kane ka jingwan buhai shnong ka bym lah shuh ban tehlakam hapoh Sikkim, khlem artatien kane kan sa pynkylla ruh ia ka jinglong jingman ha kaba iadei bad ki kynhun nongshong shnong ha ka jylla.
“Watla ka Sikkim ka dei ka jylla kaba duna ha ka jingdon briew, hynrei kala don ka jingkiew ha kaba iadei bad ka jingdon jong ki nongthep vote, kata da kumba 18 percent,” ong une u hehduh ka Humro Sikkim Party (HSP).
Ula ong ba kane kala wan long ruh namar ka jingbym lah shuh ban tehlakam ia ka jingwan buhai shnong beain da ki briew kiba na shabar hapoh Sikkim.
Shuh shuh une u nongialam ka HSP ula ong ba ka jingpyntreikam ia ka ILP ha kane ka jylla ka thain Himalaya kan iarap ruh na ka bynta ban pynneh pynsah ia ka kolshor bad ka jingithuh ia ki trai shnong ka jylla.
Lah ruh ban kdew ba ka Humro Sikkim Party (HSP) kala pynlong ruh ia ka Jan Sansad (People’s Parliament) ban iamir jingmut halor ka mat kaba iadei bad ka jingpyntreikam ia ka ILP ha ka jylla.
Ka People’s Parliament kala shim ia kine ki rai; kata ba dei ban pyntreikam noh mardor ia ka Inner line permit (ILP) hapoh Sikkim khlem da pynslem shuh.
Ka sorkar Sikkim kala mynjur ruh ia ka ri ban pyntreikam noh ia ka ILP hapoh Sikkim bad phah ia kane ka rai sha ka sorkar pdeng ba kan leh ia kaba donkam bad ba ka sorkar pdeng ka dei ban pyntreikam noh mardor ia ka ILP hapoh Sikkim.
