Shillong, Risaw 17: Ka Garoland State Movement Committee (GSMC) bad ka National Federation for New States (NFNS) kila pynbna ban pynlong da ka rally paidbah ha ka 29 tarik Risaw ban pynjur ia ka jingdawa Jylla “Garoland”.
U Deputy Chief Executive Member (DyCEM) ka Garo Hills Autonomous District Council (GHADC) bad Vice President ka NFNS Nikman Ch Marak u pyntip ba kane ka rally paidbah kan long ha madan Teteng Aja, Tura ha kaba ki nongialam jong ki kynhun dawa la ka jong ka Jylla (separate state) na kylleng ka Ri, kin wan ban iashimbynta lang.
U Marak ha ka kyrwoh ula kyntu ia baroh ki Nongialam ban iasnohkti lang ha kane ka jingdawa ban pynioh noh la ka jong ka Jylla Garo.
“To ngin ia mihlang baroh khlem da khein shynrang ne kynthei, niam, kur, jaitbynriew, kyrdan pule bad kiwei kiwei namar ka jingiatylli kaba lah ban weng ia baroh ki diengpyngkiang” ula ong.
“Lada ngi iatreilang, baroh kiba long suda. Ngin lah ban tem ia ki jingeh kiba kah ia ka lynti jong ngi. Baroh ki Nongialam na ki kynhun sengbhalang ruh ki long kiba lah pdiang sngewbha. Ngi donkam ban kyrshan mar kylliang ban lah pynurlong ia ka jingdawa ‘Garoland’ kaba la don la slem bha” ula ong.
