Imphal, Risaw 28: Ki Special Commando Unit jong ki pulit ka Manipur ha ryngkat ki shipai 33 Assam Rifles (AR), ki la ioh kurup ia ka jaka buh tiar siat, ki kuli bad ki tiar iada ha ka por ba ki pynlong ia ka jingkhynra ha ka thain Pukhao Terapur jong ka Imphal East ha ka sngi Balang.
Katkum ki pulit ka Manipur, ki tiar kiba la ioh kurup ki kynthup ia saw tylli ki sophisticated pistol kiba don ki calibre bapher bapher kiba don ia ki magazine, kawei ka launcher, saw tylli ki suloi single-barrel bad 6 tylli ki hand grenade.
Ki bor pahara ki la ioh ruh ban kurup 69 tylli ki kuli bapher bapher bad kiwei kiwei ki tiar, kynthup ia 17 tylli ki iron bulletproof plates, 22 tylli ki helmet Kevlar, ki grenade detonators bad ki arm ring.
Ka jinglap ia ki tiar ialeh, ki kuli, bad ki tiar iada ha Pukhao Terapur ha Imphal East ka wan hapdeng ka jingkhynra kaba jur, kaba la pynlong da ka jingwad bniah kaba la pynlong da ki Pulit ka Manipur bad ki bor pahara jong ka sorkar pdeng (kum ki Assam Rifles bad ki CRPF) ha baroh ar ki jaka them bad ki jaka lum.
Ka Pukhao Terapur ka don harud ka sensitive buffer zone ha Imphal East district, hajan u pud u sam synshar bad ka jingkulmar ka la jia ha ka district Kangpokpi.
Kine ki jaka khappud ha ki kjat lum ki dang long ki jaka ba ju jia man ka por na ka bynta ki jingïakynad da ki tiar,ka jingïa siat ba mar kylliang, bad ki jingshah byrngem kiba donkti ki kynhun ba don tiar bad ki kaikhlaw.
