Pdiang ka NPP ia ki 3 ngut ki MLA ka UDP ba wan iasoh
Shillong, Risaw 28 : National President ka NPP bad Myntri Rangbah Conrad K Sangma ha ka sngi Balang, ula ong ba ka jingsngewrit, ka jingiatreilang kum ka kynhun bad ka jingbuh nyngkong eh ia ki paidbah ka dei kaba pynlong ia ka NPP kaba kham pher, haba pdiang ia ki 3 ngut ki MLA ka UDP sha ka sem jong ka party.
Kine ki laingut ki MLA ka UDP ki dei u MLA ka West Shillong Bah Paul Lyngdoh, MLA ka Mawkyrwat Bah Renikton Lyngdoh Tongkhar bad MLA ka Mookaiaw Bah Nujorki Sungoh.
Ia kane ka jingpynrung dkhot la pynlong ha ka jingiadonlang ki Symbud Myntri Rangbah Bah Prestone Tynsong bad Bah Sniawbhalang Dhar, ki nongialam ka party bad ki nongkitkam.
Haba pdiang ia ki, u Conrad ula ong “Nga pdiang sngewbha ia u Bah Paul, Bah Renikton bad Bah Nujorki bad ngam kwah ban khot ia ki kum ki riew thymmai namar ngila don ia ka jingiadei bad la rim bha. Ka kyntien ‘thymmai’ kam pynpaw hok ïa ka jingïalong paralok bad ka jingïadei kaba ngi la don. Mynta ka sngi ka long ka sngi kaba ba kongsan bha ïa ngi kum ka party.”
U iathuh ba u Bah Nujorki Sungoh u dang don hapdeng ka jingsumar bad un sa wan iasoh ha kine ki khyndiat sngi ban wan.
Haba pynkynmaw ia ki sngi ba sdang jong ka party, u Conrad ula ong “Nga iohi ia ka dur ba naduh ka 24 tarik Nailar 2012 ha ka Ophis barim jong ngi ha Lachumiere. Nga don kumba 15,000 tylli ki dur barim bad haba nga peit, Nga iohi ia u Bah Renik hapdeng ki paidbah la 14 snem mynshuwa, ka sngi ba la thaw ia ka NPP ha ka Jylla. Ban khot ia u kum u riew thymmai kam shonghok satia”.
“Kane kam dei tang halor ka jingnang khlain ka party. Nga sngew kmen bha ban iohi ia ki briew ba Nga sngewtynnad eh ban iatreilang. Ngi pyrkhat kumjuh bad kwah ban leh ia ki kam ha kajuh ka rukom. Na ka bynta ka longiing ka NPP, Nga pdiang ia phi sha ka Iing jong ngi bad khmih lynti ban ia shakri lang ia ki paidbah” ula ong.
U Conrad ula ong ba ki jingiapher jingmut hapoh Iing ka ju don beit hynrei ngi pynbeit ia ka shimet shimet.
“Ki briew ki pyrkhat ba ngim don satia ia ki jingiapher jingmut, hynrei kane kam dei ka jingshisha. Ki don shibun ki kam kiba ngim iamynjur lang, ki don ki por ba ngi iashrut, hynrei ngi iashrut hapoh ka kamra, ym sha madan madiah lane ha ki lad pathai khubor. Kane ka jingiasngewthuh jingmut a pynlong ia kano kano ka party kaba khlain” ula ong.
“Ha ka synshar khadar, u Bah Prestone u lah ban nym ia mynjur bad nga, Bah Sniawbha u lah ban nym mynjur, Nga lah ban nym mynjur, hynrei ngi kylli- hato ka dei na ka bynta ka jingbha ki paidbah? Lada hooid, ngi leh ia ka. Ngim don satia ia ka jingsngew sarong. Ka jingsngewrit ka long kaba kongsan ha ka sain pyrthei bad ha kano kano ka seng” ula ong.
