Shillong, Risaw 25: Ki khynnah ialehkai karate ka Meghalaya, hapoh ka lama jong ka All Meghalaya Karate Do Association (AMKA) ki la wanrah ia ka nam bad burom ia la ka jylla hadien ba ki rang bad ki thei ialehkai ki la ioh ban ia khur mar 80 & 70 tylli ki takma ha kaba kut ka lympung ialehkai 5th KIO North East Zone Karate Championship 2026, ba long ha Convocation Hall ka NEHU.
Ha kane ka kynti, ki khynnah kynthei, ki la lah ban bat ia ka kyrdan kaba ar hadien ba ki la lah ba khur mar 17 tylli ki takma ksiar bad rupa bad bynrap 46 tylli ki takma rnong bad baroh ki long 80 tylli.
Ka nam lahduh jong kane ka jingiakob ka leit sha ka kynhun ka Assam kiba la ioh ban khur 31 tylli ki takma ksiar, 32 tylli ki takma rupa bad 47 tylli ki takma rnong.
KI khynnah shynrang, ki la iakhun tyngeh ban ioh bat ia ka kyrdan kaba lai, hadien ba ki la ioh khur mar 14 tylli ki takma ksiar bad rupa bad 42 tylli ki takma rnong bad baroh ki long 70 tylli.
Ka kyrdan kaba nyngkong bad ba-ar la bat ia ki la ioh da ki nong ialehkai ka Assam (37K, 38R, 61R) bad ka Arunachal Pradesh (20K, 15S, 17R).
Haba shim kyllum, ka jingiakhun ha kane ka lympung ka long beit tang hapdeng kine ki lai tylli ki jylla, kiba la lah ban ioh ba kin khur ia kiba bun tylli ki takma, napdeng ki 7 tylli ki jylla jong ka thain kiba la wan ban iashim bynta sha kane ka jingiakob kaba ar sngi.
Naka bynta ka kynhun ialehkai ka Meghalaya, haba khein kyllum lang baroh, ki takma ba la ioh ban khur da ki nongialehkai ka long haduh 150 tylli, kaba kiew da arshah, kata na ka 62 tylli, haba ia nujor na ka jingwan ban iakhun ka jong ki ha u snem ba la dep ha Itanagar, kaba kren shai kdar ia ka jingtrei shitom jong ki coach lem bad ka jingkyrshan borbah na ki kmie ki kpa jong ki khynnah ba ialehkai.
Ym tang kata, kum ka jylla, ka la lah ha kaban pyniaid beit pyniaid ryntih ia kane ka lympung iakhun kaba la wan ban iashim bynta jan 900 ngut ki nongialehkai karate bad ki nongpyniaid, hapoh ka jingpyniaid ka AMKA ia kaba la iarap ban kyrshan da ka Directorate of Sports &Youth Affairs bad ba la ithuh ia ka da ka Karate India Organisation (KIO).
Ka kongsan kaba la wan ban sakhi lang ha ka por ba pynkut ia kane ka lympung dei ka Sherry Lalthangzo kaba dei ka Economic Adviser to the North Eastern Council, ryngkat u bah Alertson Nongbri ba dei u Director of Sports and Youth Affairs, ha kaba u kular ba un shim khia naka bynta ban pynrung ia ka karate kum kawei na ki jingialehkai ha ka lympung ialehkai jong ka 39th National Games, ban sa pynlong ha kane ka jylla ha u snem u ban wan.
Ki nongjop na kane ka lympung iakhun, kin ioh pat ia ka kabu ksiar ba kin bteng ia ka jingioh iashim bynta ka jong ki sa sha ka lympung ialehkai jong ka KIO Inter-Zonal Karate Championship 2026, kaba la buh ban long ha New Delhi ha u snem u ban wan.
Ha kane ka kynti, nalor ka jingpynialehkai ia ka kata bad kumite, la pynlong artad ia ka KIO Referee and Coaches Seminar and Examination, kaba hangne, na ka jylla Meghalaya la poi ban iahsim bynta da ki 21 ngut ia kaba la pyniaid da u Premjit Sen ba dei u Chairman ka KIO’s Referee Commission.
