Itanagar, Risaw 25: Kumba 15 ngut ki briew kiba la shah kem ha kaba ïadei bad ka jingïakynad ha Pasighat, bad ka lah ban don shuh shuh ki jingkem katba ki pulit ki nang pynjur ïa ka jingtohkit jong ki, ong u IGP jong ki pulit ka Arunachal Pradesh (Central Zone) u Hibu Tamang ha ka Sngi U Blei.
U Tamang u la ong ba la buh shuh shuh ia ki bor pahara ha Pasighat ban pynneh ia ka suk ka sain hadien ka jingkulmar.
La register 6 tylli ki case ha kaba iadei bad ki jingjia thombor, thang bad thombor ia ki pulit bad ia ki pulit ka Central Armed Police Forces (CAPF), u la ong.
Palat 40 ngut ki briew na ki pulit ka jylla bad CAPF kynthup ia uwei u ophisar ba bat ia ka kyrdan Deputy Superintendent of Police (DSP) ki la mynsaw ha ka jingshah kawang maw bad jingshah thombor kaba la kynnoh ba la leh da ki nongiakhih, ong u IGP.
U Tamang u la ong ba ka jingtohkit kaba bniah ka dang iaid shakhmat ban lap ia kiba la kynnoh ba ki donkti ban pynshit ia ki samla bad kiba donkti ha katei ka kam thombor.Yn sa shim ia ki sienjam katkum ka ain kiba kham bniah katkum ki jinglap, u la bynrap.
U la kynnoh ruh ba ki don ki nongiakhih kiba la buaid bad kiba rah ia ki bilor beer bad ki bilor kyiad ha ka por ba pynlong ia ki jingiakhih.
Katba ki ophisar bad ki nongtrei jong ka NHPC ha Pasighat ki shngain bad la pynbiang ruh ia ka jingpahara da ki pulit ka Central Reserve Police Force (CRPF), la ong u Tamang.
Ki pulit ki la iathuh ba ka jingtohkit ka dang iaid shakhmat bad la khmih lynti ban kem shuh shuh katba ka jingpyrshang ban ithuh ia kiba donkti ka nang kiew.
