Imphal, Risaw 25: Ka Enforcement Directorate (ED) ka la kem ïa 6 ngut ki briew, bad ka la khang ïa ki 1,424 tylli ki bank account bad kurup ïa kawei ka Commercial building bad ka jaka kaba shongdor ₹17.82 klur ha ka jjingkyndang ïa ka kam khaii drok na shilliang pud bad ka hawala network kaba treikam ha Mizoram bad Manipur.
Ia kane ka jingtalasi ba iatreilang la pynlong ha ka 23 tarik u Risaw ha Aizawl, Champhai bad Lawngtlai ha Mizoram, bad ha Churachandpur ha Manipur, kum shi bynta jong ki lai tylli ki jingtohkit ban lum pisa kiba iadei bad ka jingkynnoh khaii ia u drok heroin, brown sugar bad methamphetamine na Myanmar.
Ka ED ka la ong ba ka dor baroh ki mar ki mata ba la ïoh pdiang ha ki jingtohkit ka la palat ïa ka ₹26 klur, kynthup ïa ka ₹8.19 klur ba la ïoh kham mynshwa lyngba ka jingpynsangeh ïa ki bank account ba la kynnoh ba ki don jingïadei bad ki kam hawala kiba ïadei bad ki dawai pynbuaid.
Ka jingia dei kaba thymmai kaba iadei bad ka Hotel JTS, ka commercial building kaba san mala ryngkat bad ka jaka kaba heh 571.11 square meter ha Zion Veng ha Champhai, kaba shongdor haduh ₹17.82 klur.
Ki don 6 ngut ki briew kiba la shah kem hapoh ka Prevention of Money Laundering Act (PMLA), ha kaba la kem mar lai ngut ha Mizoram bad Manipur.
Kiba la shah kem ha Mizoram ki long u Kashyap G. Thakkar na Aizawl, ha ka mukotduma Krishiv Enterprise bad u Thangkhuala na Champhai bad u T. Chatuan Vanlalgakha na Aizawl, ha ka case u Jabrul Haque.
Ha Manipur, ka ED ka la kem ia u Zenngaihniang ba la sin Taniang, u Nengzatuan Valte ba la ju sin Tuanpi bad u H. Gouzalal baroh na Churachandpur, ha kaba ia dei bad ka jingkynnoh pynkhuid ia ka pisa kaba la ioh na ka khaii brown sugar.
U Taniang bad u Tuanpi, ki dei kiba la don lypa ha ka Judicial Custody, ha ki kam ba iadei bad u droks bad la kem thikna ia ki, da ka jingbit jong u special judge, NDPS, Churachandpur.Ia kine ki nongshah kynnoh la rah hakhmat ki iingbishar ba kyrpang kiba don ha ka bor synshar, la ong ka tnad.
Ïa kane ka jingtalasi la pynlong ha ka jingïatreilang bad ka tnat Narcotics Control Bureau bad ki Pulit jong ka Jylla Mizoram.Ki nongtohkit ki la ioh ban kurup ia ki ledger, ki cheque book, ki debit card, ki mobile phone bad kiwei kiwei ki tiar digital ba la kynnoh ba la pyndonkam ban pynsuk ia ki kam khaii.
Ki bank la kynnoh ba la pyndonkam ban pynpoi ia ka pisa.
Kat kum ka jingong jong ka ED, ki jingtohkit ki la lap ïa ka network ba ïasoh lang ha kaba ki bank account ha Champhai, Aizawl bad Lawngtlai la kynnoh ba ki ïoh pisa na ka jingdie ïa u drok ha kylleng ka Jylla Manipur, Mizoram, Assam bad Tripura shwa ba ïa ka pisa yn pynpoi sha ki supplier ha Myanmar.
Ka tnad, ka la ithuh ia kawei ka Mini-ATM bad ka jaka phah pisa, kaba la tip kyrteng kum ka M/s Go Alpha Trip, kaba don ha Churachandpur, kaba la pyniaid da u H. Gouzalal, kum ka bynta ba kongsan jong ka network pisa kaba la suba.
Hapdeng u snem 2024 bad u bnai Jylliew 2026, la iathuh ba katei ka la pynlong ia 2,947 tylli ki jingpynkylla kaba kot sha ka ₹175.03 klur sha ki nongkhaii, ki dukan die dawai bad ki riew shimet ha Mizoram.
Ka ED ka la kynnoh ba ka pisa ba la lum na ka jingdie drok la thep lyngba ki Mini-ATM bad ki Customer Service Point Counter shwa ban pynpoi lyngba ki Bank Channel sha ki Account jong ki nongïoh jingmyntoi.
La kynnoh ba ki don ki nongbat account kiba ailad ban pyndonkam ïa ki bank account jong ki na ka bynta ka commission kaba ₹500 man ka lak tyngka.Ka tnad ka dang bishar bniah hato la pyndonkam ia kine ki jingkhein ban buhrieh ia ka jingsdang bad ka jingleit jingwan jong ka pisa.
Ka jingtohkit ka la lap ruh ïa ki jingïaid ïew kiba jur bha sha kiba la suba ba ki khlem laisen ha Champhai.La iathuh ba ki Account kiba iadei bad kawei na kum kine ki nongpyniaid, ka Lalrampari bad u tnga jongka, U Lalliansanga, uba dei u trai jong ka M/s JTS Store, ki la ioh jingtip ba ki ioh credit haduh kumba ₹268.80 klur, kaba kynthup ia ka ₹125 klur ha ka jingthep pisa kaba mih na Assam, Nagaland, West Bengal, Tripura bad Delhi.
Ka ED ka suba ba ka jingmih na ka jingdie drok ha ki bynta bapher bapher jong ka ri India la pynpoi lyngba ki jingpyniaid pisa ba la buh kyrdan bad ki nongpyniaid hawala shwa ban pynbeit bad ki nongkhaii drok kiba don ha Myanmar.
Ki dawai kiba la kynnoh ba la pynpoi sha shiliang u pud u sam jong ka Myanmar.
Ka jingtohkit ka la lap ruh ïa ka jingsuba ba don ka jingïadei hapdeng ki jnongpynpoi ia ki dawai ba la phah na India bad ka jingpynmih ïa ki Methamphetamine ha Myanmar.
Katkum ka ED, hapdeng u Lber bad Naiwieng 2024, ka M/s Krishiv Enterprises ka la phah kumba 32 ton ka caffeine ha ki 15 tylli ki jingkit, nalor 10 ton ka Aluminum Chloride anhydrous.
Ïa ki mar ba la phah la thoh lyngba ki e-way bill bad ki GST invoice bad la phah sha ki dukan die dawai kiba rit bad sha ka general store ha Aizawl bad ki jaka khappud jong ka Mizoram.
Ka tnad ka la kynnoh ba ki jaka treikam ki duna ïa ki jaka shna ne pynkhreh ïa ki dawai bad hadien kata la pynkynriah ïa ki dawai sha shiliang pud sha ki jaka pynmih tablet ha Myanmar.La kynnoh ba la pyndonkam ia ka Caffeine anhydrous kum ka dawai pynheh ne pynduh ha kaba pynmih ia ki dawai Methamphetamine kiba la ju tip kum ki Yaba.
Shuh shuh ka ED ka la kynnoh ba ki drok ba la dep ban rung sha Mizoram lyngba ka jingkieng wah Tiau hajan ka Zokhawthar, marpyrshah bad ka Khawmawi ha Myanmar, shwa ban pynkit lyngba ka Champhai bad Aizawl sha Vairengte bad sha ki khappud jong ka Assam bad Tripura.
Ka jingtohkit ka iadei bad lai tylli ki jingkem drok
Ki jingtohkit halor ka jingpynkylla pisa ki la mih na ki lai tylli ki case ba la rejistar hapoh ka Narcotic Drugs and Psychotropic Substances Act.
Kaba sngewkhia ba nyngkong ka dei halor ka jingioh kurup jong ki Pulit ka Zokhawthar ha Champai ha ka 14 tarik u Lber 2025 ia u drok Heroin uba heh 4.722 kg, uba la thep ha ki 440 tylli ki sop sabon La kynnoh ba ia katei ka mar la kit sha Aizawl na ka bynta uwei u nongkhaii uba na Myanmar.
Kaba ar ka dei kaba iadei bad ka jingioh kurup jong ka NCB ia ki dawai Methamphetamine tablet kiba khia 49.101 kg bad heroin 40 gram ha jan Seling ha Mizoram ha ka 21tarik Nailar 2025.La kynnoh ba une u drok u dei uba la mih na Myanmar bad la thmu ban pynpoi hajan u khappud Damchhera-Kanhmun.
Ka case kaba lai ka mih na ka jingioh kurup 2.413 kg ki shini brown sugar bad ₹31.43 lak tyngka da ki pulit jong ka Churachandpur ha ka 2 tarik July 2026.Ka ED ka kynnoh ba katei ka pisa ka dei kaba mih na ka jingdie drok bad la thmu ban phah sha ki nongkhaii drok ha Mymar.
Ka tnad ka la ong ba ka jingtohkit kaba kham bniah ka dang ïaid shakhmat ban lap ïa kiwei pat ki nongïoh jingmyntoi na ka jingïaid lynti pisa ba la suba, ban wad ïa ki jingmih ba kham bun na ki kam runar bad ban bishar bniah ïa ki bynta kiba lah ban don jong ki heh ophisar jong ki bank bad ki nongpynïaid pisa.
