Nongstoin, Risaw 15 : U Myntri Rangbah Conrad K Sangma ha ka sngi Palei, ula pynbna paidbah ba ka Maternity & Child Health (MCH) Hospital, Nongstoin kan sdang treikam noh mynta bad ka dei ka jingpynurlong ia ka jingangnud u paidbah ba la kular ha ka jingialang CM-Connect.
Ha kane ka jingialang, u Myntri Rangbah ula pynkup burom ruh ia ki trai jong ka jaka ba ieng ka MCH Hospital, buh ia u maw nongrim jong ka Golden Jubilee Garden ha Nongstoin, buh ia u maw nongrim jong ka Building DIET ba thymmai bad buh ia u maw nongrimka surok Sohpian-Nongstoin.
Nalor kane, ula aiti ruh ia ka ambulance kaba la ai sngewbha da ka IDBI Bank hapoh ka CSR sha ka Tnad ka Koit ka Khiah. Kiba la iadonlang ki kynthup ia u Myntri Sorkar Bah Methodius Dkhar, MLA Bah Gabriel Wahlang bad RG Momin lem bad kiwei kiwei.
Haba ai jingkren, u Myntri Rangbah ula ong ba ka Nongstoin MCH ka dei ka jingkular b aula ai ha ka jingialang CM Connect, kaba ki paidbah kila pynsngew ia kane ka jingeh kaba la slem bha ban pynbeit.
U Myntri Rangbah ula ong ba ka CM Connect ka dei ka jingpyrshang jong u ban pynthikna ba ki jingeh jong ki paidbah ka poi sha ka skhor jong u Myntri Rangbah bad sha baroh ki tnad Sorkar.
“Nga shim ba kane ka lah ban dei kawei na ki synshar paidbah ba paka tam kaba ngi don. Ia kane la shim kum ka jingleh kaba bha tam ia kaba u Myntri Rangbah Duh bad ka Ophis jong u, kila kyntu ia nga ban batai halor ka CM Connect sha baroh ki Myntri Rangbah ka ri India” ula ong.
U iathuh ba hadien ba dep ka CM Connect, ki Heh Ophisar ka Tnad ka Koit ka Khiah kila shong bishar ia ki kam bala pyntrei ha u Naiwieng 2025 bad pynbeit ia ki nongtrei, ki tiar sumar bad ki jingdonkam baroh, kaba lam sha ka jinglah ban pyntreikam noh ia ka hospital mynta.
Ia ka Maternity and Child Health Hospital ha Nongstoin lah tei ha ka jinglut kaba kot T.31.05 klur.
Ka Hospital ka don ia ka OPD bad Laboratory complex, ka emergency unit, kamra kha khun, ICU, Neonatal Intensive Care Unit (NICU) bad ka operation theatre complex. La pyndait ruh ia ka PSA oxygen plant ha ka jinglut ba kot T.0.37 klur.
Lah shimkhia bha ia ka namar ka jingiap ki longkmie ba kha khun bad ki khunlung ha West Khasi Hills ka dei kaba heh duh hapoh ka Jylla.
La tyrwa ruh ban buh ia ka District Early Intervention Centre (DEIC) hapoh ka Hospital na ka bynta ban khmih bniah bad ai jingsumar ba kham kloi ia kiba slem ban wan sha ka jaka sumar bad ka jingduna dkhot met ki Khynnah.
Haba pynpaw ba ki kam pynroi kam dei ban kut tang ha Shillong bad Tura, ula ong ba ka jingkynshew kaba heh duh ka dei T.383.91 klur ban pynheh ia ka surok ba 35km na Maweit-Nongjri kaba dei shibynta jong ka surok Nongstoin-Maweit-Nongjri, kaba pyniasoh ia ka Nongstoin sha Ranikor, South West Khasi Hills.
Baroh lang, ki jingkynshew ha ka project surok ha Nongstoin ka kot sha ka T. 498.31 klur.
– surok Nongstoin–Nongjri – T. 383.91 klur
– surok Nongstoin–Maweit hapoh ka RIDF – T. 63.01 klur
– surok Sohpian–Nongstoin – T. 22.27 klur (buh mawnongrim mynta ka sngi)
– surok Nongkhlaw–Byrki–Umdohlun ryngkat artylli ki jingkieng hapoh ka PMGSY-III – T. 29.12 klur.
U Myntri Rangbah ula bthah ia ka Tnad PWD bad ki contractor ba kin bat ia ka jingtreikam bha da ki maw ba paka, ki lynti iaid kjat bad ki nala. Ula bthah ruh ia ka DC bad MLA ba kin peit thuh bha ia ki kam bad ai jingtip beit beit sha u.
Katba ka West Khasi Hills ka rakhe ïa ka jingdap 50 snem, u Myntri Rangbah u la ong ba ki snem ban wan ki dei ban long kiba kongsan bha na ka bynta ka lawei jong ka distrik. U la kyntu ban buh ïa ki thong katkum ki constituency bad ka distrik kaba 3 snem, 5 snem, 10 snem bad ka jingthmu kaba 50 snem, khnang ba ki samla kin ïoh lad ban ïashim bynta ha ka jingtei ïa ka lawei.
U la iathuh ba ha kine ki 8 snem ba la leit noh, ka Sorkar kala pyntreikam ïa ki projek ha West Khasi Hills kiba shongdor jan T. 900 klur ha baroh ki bynta jong ka roi ka par. Ka jingbei tyngka kaba kum kane la pyntreikam ruh ha South West Khasi Hills, South Garo Hills bad East Jaintia Hills.
U la ai nuksa ïa ka surok Sutnga–Saipung kaba shongdor T. 450 klur, kaba la mynjur ban pyntrei, hynrei kabym shym la tei naduh ba la ioh ïa ka jylla Meghalaya.
