Shillong, Risaw 13 : Ka Iingkashari Meghalaya High Court ha ka sngi Ba-ar kala aipor ia ki 19 ngut ki nongsaid ain kiba ngat ha ka criminal contempt ne jingialeh pyrshah ia ka hukum ka Iingkashari namar ka jingkhot ia ka jingiakhih ban pep leit pyndep ia ki kam ka Iingkashari, ba kin ai ia ka affidavit ba pan map khlem ka jingbuh kyndon.
Haba pyntreikam ia ka hukum ba 8 tarik Risaw 2026, bad ai notice hapoh ka Section 15 jong ka Contempt of Courts Act, 1971 pule lang bad ka Article 215 jong ka Riti Synshar ka Ri India, baroh ki nongsaid ain ba ngat mukotduma kila wan mih hi da lade, lait noh ki nongsaid ain kiba don ha ka serial number 13 bad 15 (vi), ong ka Division Bench ka Chief Justice Revati Mohite Dere bad u Justice H. S. Thangkhiew.
“Baroh kila pan por ban aiti iala ki jong ki affidavit ban pan map khlem kyndon bad kular ruh ban nym leh shuh ia kum kane ka kam. La mynjur ban ai ia ka por. Yn shim bishar biang ia kane ka kam ha ka 14 tarik Risaw, 2026” ong ka Iingkashari.
Ka Iingkashari ha ka 8 tarik Risaw kala register ia ka suo motu PIL No. 21/2026 bad niew bein ia ka jingpep khlem pud ban wan sha iingkashari da ka Shillong Bar Association bad ka High Court Bar Association naduh ka 1 tarik Risaw ba dawa ban weng ia u Advocate General.
Ka Iingkashari kala phah notice sha ki 21 ngut ki nongkitkam jong kine ki Association-14 ngut na ka High Court Bar Association bad 7 na ka Shillong Bar Association- ba kin ai jingpynshai balei ba ym dei ban tian bishar criminal contempt ia ki bad bthah ia ki ba kin wan mih hi dalade hakhmat ka Iingkashari ha ka 13 tarik Risaw.
Kito kiba ngat ha ka mukotduma contempt ki kynthup ia u President ka High Court Bar Association K S Kynjing, Vice Presidents N Syngkon bad Pyllang Nongbri, Secretary General Kishore Ch Gautam, Secretaries Andrew R Passah bad Arnold G Momin, Treasurer Sujit Dey, executive members Apu Dey, Andrew M Sangma, Cherak C T Sangma, Jonathan M Thangkhiew, H L Shangreiso, Melvbin M Laitmon, Raymond K Majaw bad Rosylia Kharshiing.
Na ka Shillong Bar Association ki kynthup ia u President H R Nath, Vice President Nelson Kharnarbi, Secretary Teiborlang Jyrwa, Assistant Secretaries N Shyambor Singh Marpan bad Nurina N Lyngdoh, Treasurer Ilawanda S Lyngdoh bad executive members Kishore Ch Gautam, Ricky Nelson Marbaniang, Jonathan M Dkhar, Jyoti K Marak, Krishna Sharma bad Stevie R Lyngdoh.
