Shillong, Risaw 13 : U Myntri ka Tnad Housing Marcuise N Marak ula bthah ia ki Ophisar ba kin trei pynsted noh ia ki kam ba dang sahteng bad pynkhlain ia ka jingiatreilang hapdeng ka Directorate bad ki Ophis ha ki District khnang ban pynthikna ia ka jingpyndep hapoh ka por ia ki housing project.
Haba pyniaid ia ka jingialang bishar kam bad ka Tnad Housing ha State Convention Centre, Shillong, u Myntri ula kyntu ia ki Ophisar ba kin iatreilang kawei ban lah kynjoh ia ka thong jong ka Tnad bad ban lah weng ia ki jingeh kiba don.
Ha kane ka jingialang la iashimbynta da u Secretary ka Housing B S Sohliya, Joint Secretary L C Marak, Director Housing A S Mukhim, Executive Engineer M S Kharmalki, ha ryngkat ki nongtrei ka Directorate, District Housing officers, Housing Inspectors bad kiwei kiwei.
U Director Housing ula ai ia ka jingbatai kaba bniah halor ki kam jong ka Tnad, batai ia ka jingiaid jong ki project bad ki skhim bapher bapher, ki kam ba dang sah bad ki jingeh ba iakynduh.
