Shillong, Risaw 13 : Ka Kynhun Myntri ka Sorkar Jylla ha ka sngi Ba-ar kala ai jingmynjur ban thungkam pura sa ia ki 26 ngut ki nongtrei adhoc, kaba kyntiew ia ki nongtrei bala thungkam pura sha ka 4000 ngut ha kine ki khyndiat snem bala leit.
U Myntri Rangbah Conrad K Sangma hadien ba pyniaid ia ka jingialang, ula ong ba ki 26 ngut ki nongtrei ki dei kiba la thung pyrshah ia ka sanction post ha lane hashuwa ka 31 tarik Nohprah, 2007 khlem da bud ia ki kyndon thungkam.
“Kane ka dei ka batch kaba san ba ngi la thungkam pura. Man ka por katto katne ki jingeh kila mih ha kaba don ki briew kiba la thung kum ki adhoc hashuwa ka 31 tarik Nohprah kila shah ieh shadien” ong u Conrad.
Ula pynshai ba ki adhoc hangne ki thew sha ka jingthungkam beit beit pyrshah ia ki sanction post khlem da thoh eksam lane interview.
Kane ka sienjam ka long kaba iaid kat kum ka hukum ka Supreme Court kaba shah ia ka Jylla ban thungkam pura ia kum kine ki jingthungkam, ula ong.
