Shillong, Risaw 13 : Ban pynkut ïa ka jingiakhun ban iohrung skul ki khynnah ba ju iai jia na ka por sha ka por, ka kynhun Myntri ka Sorkar Jylla ha ka sngi Ba-ar, kala ai jingmynjur ia ka Meghalaya School Education School Complex Rules, 2026.
U Myntri Rangbah Conrad K Sangma, hadien ba pyniaid ia ka jingialang, ula ong ba kane ka Rule ba thymmai kan pyniasoh ia ki skul Lower bad Upper Primary lem bad ki skul Secondary bad Higher Secondary ba don marjan lyngba ki skul bala jied kum ki nodal school.
Haba pynbna ia ka rai, u Conrad ula ong “Ka Kynhun Myntri kala ai ia ka jingmynjur na ka bynta ka Meghalaya School Education School Complex Rules 2026.”
Haba batai ia ka jingdonkam kane ka jingpynkylla, ula ong ka Meghalaya ka don haduh 9,244 tylli ki skul Lower Primary, 2,396 tylli ki Upper Primary, 1,755 tylli ki Secondary bad tang 532 tylli ki skul Higher Secondary.
Haba pynpaw ba ka jingiapher ha ka jingdon ki skul kala wanrah ia ka jingeh kaba khraw ia ki khynnah pule, ula ong “Kane ka jingeh ha ka jingdon jong ki skul ka pynlong ia ki khynnah skul ban nym ioh rung skul bad ka pynlong ruh ia ki khynnah pule ban hap shim admission haduh arsien, lai sien ha ka por ba ki dang don ha ka jingpule kaba mut ha ki katto katne ki khep, ki khynnah ki hap shim admission shisien ha ka klas I, kaba ar ha ka klas VI, bad sa ha ka klas IX bad klas XI”.
Haba batai ïa kane kum ka kam kaba pynjynjar ïa ki khynnah, u Myntri Rangbah u la ong ba ka School Complex Rules kan pynthikna ïa ka jingïaid lynti jong ki khynnah na kawei ka kyrdan sha kawei pat, khlem da hap ban pynbiang biang ïa bun tylli ki kot ki sla.
“Ngi la pyrshang ban pynïasoh ïa ki skul LP, UP bad ki skul secondary bad higher secondary kiba don marjan. Ngi kwah ban thaw ïa ki nodal school kiba lah ban pynsuk ïa ka jingai admission khlem da donkam ïa ka Transfer Certificate (TC) bad kiwei ki jingdonkam kiba ju hap pyndep,” u la ong.
“Ia kine ki nodal school yn pyniasoh bad ki skul lower primary bad upper primary , khnang ba kan pynsuk ia ki khynnah pule kiba kiew kyrdan bad kin ym hap ban pynbiang biang ïa baroh ki kot ki sla” ula bynrap.
U Conrad u la pynshai ba kane ka rukom treikam kan long da kaba mon sngewbha, bad kan ym ktah ïa ka jinglaitluid jong ki skul ban pynïaid ïa la ki jong ki kam.
“Kam dei ka rukom treikam kaba hap ban bud ryntih beit hynrei yn pyntreikam tang ha kito ki skul kiba kwah bad kiba mon ban ïatreilang bad ngi. Kan ym ktah satia ïa ka rukom treikam, ka rukom pynïaid kam bad ka bor shim rai jong kata ka nodal school,” u la ong.
“Ka jingthmu ka long tang ban buh ïa ka rukom treikam kaba shai bad kaba pynsuk ïa ka jingkiew kyrdan ha ka jingpule, kum na Class V sha Class VI bad na Class VIII sha Class IX, bad kiwei ki kyrdan pule kiba bud” ula bynrap.
U Myntri Rangbah u la ong ba kane ka jingpyrshang kan ïarap ruh ïa ka sorkar ban ithuh ïa ki jaka ba dang duna bad ban tei ïa ka rukom ïatreilang kaba kham khlaiñ hapdeng ki secondary bad higher secondary school, khamtam ha ki block bad subdivision kiba dang sahdien ha ka jingdon jong ki skul.
