Shillong, Risaw 07: Ka Directorate of Higher and Technical Education (DHTE), Meghalaya ka la khot ia ki aplikeshon ba thymmai bad kiba donkam ban pynthymmai na ka bynta ka Chief Minister Scholarship Scheme (CMSS) jong u snem 2026–27.
Kane ka skhim ka long naka bynta ki nongshong shnong ba pura jong ka Meghalaya kiba pule naduh ka klas XI haduh ka kyrdan PhD ha ki jaka pule ba la ithuh daka Sorkar hapoh ne shabar ka jylla.
Katkum ka jingpynbna ba la pynmih ha ka 5 tarik u Risaw, la plie ïa ka online application portal ha ka 7 tarik Risaw 2026.
Ki samla pule ki hap ban aiti ia ki aplikeshon haduh ka 6 tarik Naiwieng 2026. Ki jaka pule kin ioh por haduh ka 4 tarik u Nohprah 2026, ban pyndep ia ka jingpynshisha ia ki aplikeshon bad ban pynbeit ia ki jingduna.
Ki nongaplai ba thymmai ki dei ban buh ia ki Marksheet, ka dur, ka Bank passport bad ka jingpynshisha ia ka jinglong trai shnong jong u nongaplai ne ki kmie ki kpa.
Na ka bynta ki aplikeshon ban pynthymmai, ki samla pule ki dei ban bsuh lang iaka Marsheet jong u snem ba la dep, ka kot pynshisha na ka jaka pule jong ki kaba mynta ne kaba thymmai bad ka dur passport ba dang shen, ka passbook.
Ki samla pule kiba dei hok ki lah ban apply online lyngba ka scholarship portal jong ka sorkar Meghalaya, ka Meghalaya One.
Na ka bynta ki jingkylli lane ki jingïarap, ki nongaplai ki lah ban ïakynduh ïa ki bor ba dei peit ha ka [email protected].
La kyntu ia ki samla pule ba kin pyndep ia ki aplikeshon jong ki shwa ka tarik ba la buh ha ka 6 tarik u Naiwieng bad ban pynthikna ban don baroh ki kot ki sla kiba donkam.
