Itanagar, Risaw 5: Ka jingiakhih pyrshah ia ka jingthmu ban pyntreikam ia ka Siang Upper Multipurpose Project (SUMP) kaba 11,200 MW ka la jur bha ha ka thain Siang, ha kaba la iathuh ba ki don ki jingialeh pyrshah hapdeng ki nongiakhih bad ki bor pahara ha ki thain Riga bad Ugeng.
Ka jingjia ka la jia katba ki kam kiba ïadei bad ka kaiphod treikam jong ka projek (PFR) ki dang ïaid shakhmat.Katto katne ngut ki briew, kynthup ia ki shipai CRPF bad ki nongiakhih na katei ka jaka, ki la mynsaw.La thang ruh ia kawei ka ktem CAPF ha ka por ba don ka jingkulmar ha Upper Siang.
Ki jaidbynriew trai ri trai muluk ki la pyrshah ia kane ka projek namar ka jingsngewkhia shaphang ka jingduh jaka, ka jingshah pynkynriah jaka, ka kamai kajih, ki jingthaw ba im bad ka jingktah kaba jur ia ka wah Siang.Ki nongiakhih ki la khot ban sangeh noh ia ki kam survey tad haduh ban da ioh ia ka jingmynjur na ki paidbah.
Hynrei ka sorkar jylla ka la pynskhem ba ka jingtreikam kaba mynta ka long tang ha ki jingpeit bniah ia ki jingstad na ka bynta ka PFR.
U Symbud Myntri Rangbah ka Jylla Chowna Mein haba ïada ïa kane ka projek halor ki nongrim ba kongsan bad ka jingpynïaid ïa ka um u la ong, “Ïa ka Medog dam ba la tyrwa ha China la shna nyngkong eh na ka bynta ban pynmih bording na ka um, ha kaba la antad ba ka jingjrong ka long kumba 2,000 meter (2 KM) bad ka jinglah ban buh um ka long kumba 5.5 billion WMP. 280–300 meter bad kumba 9.2 billion cubic meter ka jaka buh um ba im (live storage), ka dei nyngkong eh shaphang ka jingbuh, pynbeit bad pyniaid ia ka um, ryngkat bad ka jingpynmih bor ding.”
U la kynthoh ba ka jinglah ban buh um kaba kham heh jong ka SUMP ka lah ban iarap ban pynbeit ia ki jingmih kynsan sharum bad ka jingtuid kaba jur, ban pynduna ia ka jingma jong ka jingshlei um ha ka thain Siang bad ki jaka ba shapoh jong ka Arunachal Pradesh bad Assam.
Wat hapdeng ka jingbatai jong ka sorkar, ki kynhun trai shnong ki dang bteng ban dawa ban sangeh noh ïa ka kam jurip bad ban kham pynbun ïa ka jingmynjur na ki paidbah bad ki jingeh ha ka mariang shwa ba ka projek kan ïaid shakhmat.
