Shillong, Risaw 01: Ka Meghalaya kala rekod ia ka jingioh duna ia u slap kaba long haduh 60% ha ka aiom lyiur jong u snem 2026 bad kala ioh pdiang tang 1,077.1 mm u slap na ka jingslap kaba baroh shi katta kaba long 2,695.3 mm, katkum ka India Meteorological Department (IMD).
Kane ka jingduna kadei kaba la rekod na ka bynta u bnai Jylliew-Nailur kaba dei ka aiom lyiur, ha kaba ka aiom slap kala sdang naduh ka 9 tarik u Jylliew.
Ka jingduna u slap kadei kaba jia ha kylleng ki bynta jong ka jylla. Na ki 11 tylli ki 11 district ia kaba la lum ia ki jingtip, kila don 7 tylli kiba la rekod ba kala don ka jingduna slap kaba jur bha, 3 tylli kidei kiba la shu biang ha ka rukom duna slap bad dei tang ka South West Khasi Hills kala ioh pdiang ia ka jingpahuh ha ka rukom slap.
Ka West Jaintia Hills kadei kaba la rekod ia ka jingduna slap kaba kot haduh 79%, bud pat da ka West Garo Hills kaba long 71% bad South West Garo Hills kaba long 70%. Ka East Jaintia Hills bad North Garo Hills kila ioh ia ka rekod ia ka jingduna kaba long 66%, katba ka West Khasi Hills ka la rekod ia ka jingduna kaba long 67%.
Napdeng kitei ki district, ka South West Khasi Hills kadei tang ma ka hi kaba ioh ia ka rekod jong ka jingioh bun bha ia u slap bad kala ioh pdiang ia u slap haduh 2,727.7 mm kaba la long palat ia kaei kaba ka ju ioh baroh shi katta kaba long 1,851.6 mm, ka jingheh da 47%.
Ka East Khasi Hills, Ri Bhoi bad South Garo Hills kila rekod ia ka jingioh duna bha ia u slap kaba long 54%, 48% bad 51% hapoh jong kaba kidei ban ioh slap.
Ka Sohra kala ioh pdiang 5,277.2 mm, kaba don jingduna kumba 36% na ka jingioh slap kaba baroh shi katta kaba long 8,301.1 mm, katba ka Mawsynram kala rekod ia ka jingioh slap kaba 6,169.1 mm pyrshah ia ka jingioh kaba barabor kaba long 9,338.4 mm, ka jingduna kaba long 34%.
Ka Nongstoin kala mad ia ka jingduna slap kaba long 62%, kala ioh pdiang ia u slap uba long tang 996 mm na kaei kaba ju ioh kaba long 2,641.8 mm. Ka Jowai kala rekod ia ka jingduna kaba 66%, katba ka Tura kala long hapoh jong ka 59%.
Ka Baghmara kala ioh pdiang 2,258.6 mm, bad kala don ka jingkiew kaba 22% na ka jingslap kaba ju mad baroh shi katta.
Ka IMD kala kdew ba ki jaka kiba duna ia u slap kata 60% haduh 99% kum kaba la duna jur bha, katba ka jingduna kaba naduh 20% hadien 59% kadei kaba la niew kum ka jingduna kaba biang”.
Kine ki rekod ki pyni ba kala don ka jingbym ryntih ha ka rukom ioh slap ha kylleng ki bynta ka Meghalaya mynta u snem, ha kaba bun ki district kila ioh pdiang duna bha ia u slap bad na ki por jong ka jingslap kaba baroh shi katta.
