Shillong, Risaw 01 : U MLA ka UDP na West Shillong Bah Paul Lyngdoh ha ka sngi Palei ula kynthoh ia ka jingkynnoh khrong pisa beain ki Pulit ha Mawkhanu bad Thanlashalai, bala sei pyrthei da ka jing khynra ka KSU, bad ong ba kino kino ki kam kiba pyntroin ia ka jingshaniah u paidbah dei ban tynjuh pyrshah.
“Ki jingtip jong nga ki dang duna bha, tang kaei kaba la paw ha ki lad pathai khubor, kumta ngam lah ban kynthoh palat saying da nga la ioh ia ki jingtip ba bniah. Hynrei kino kino ki kam beain dei ban tehlakam. Kano kano ka kam kaba lam sha ka jingpyntroin ia ka jingshaniah u paidbah ha ka rukom treikam, dei ban tynjuh pyrshah bad Ngan ieng na ka bynta kano kano ka kam kaban long ka jingmyntoi jong u paidbah” ula ong.
Halor ka jingdawa ia ka jingtohkit, ula ong ba kane ka dei ban long ka suo motu.
“Ka dei ban long kumta..Ha ka jingshisha, ym donkam ban hap dawa, ka Tnad ka dei ban leh hi dalade. Kam donkam ban ai jingiada iano iano ruh kiba leh kam bymman” ula ong.
Halor ka jingdawa ban weng ia u Deputy Commissioner bad Superintendent of Police ka East Khasi Hills, u Bah Paul ula ong “Ai ba ka jingtohkit kan don shuwa. Ai ba kin pynkhreh ia ka kaiphid bad kino kino kiba donkti kin hap ban shah pynshitom”.
