Nongstoin, Nailur 30 : Ki Dkhot ka VPP Youth Wing hapoh ka jingialam u MDC ka Nongstoin Dr Juristman Iawphniaw ha ka sngi Balang kila iatur sha ka Ophis ka Deputy Commissioner, West Khasi Hills ban pynsangeh ia ka interview thungkam nurse ha MCH Hospital, Nongstoin bad poi sha ka jingiapyni bor bad ki Pulit kiba pahara ha kane ka Ophis.
Kane ka kynhun kala poi naduh ka por 10 baje mynstep ban aiti ia ka dorkhas halor ka jingthungkam Nurse bad kila rah ruh ia ki kot ki sla ia kaba ki kam ba ki dei ki sakhi halor ka jingkynnoh bamsap bad ka jingbym long shai ka rukom pyniaid ia ka jingthungkam.
U MDC bad ki dkhot ka Youth Wing kila ia ap hakhyrdop ka Ophis ka DC la palat arkynta eiei, haba khmih lynti ban iakynduh ia ka DC. Hynrei, kam shym la don satia ka jingkhot iakren bad ki Pulit ba pahara, kila khang ia baroh ba kin rung shapoh ka Ophis.
Ka huri hura kala thnem hadien ba ki dkhot ka VPP kila pyrshang ban plie jubor ia ka khyrdop ban rung shapoh, kaba lam sha ka jingiapyni bor bad iakhru bad ki Pulit.
Kane ka jingjia kala jia shisngi hadien ba u MDC ka Nongstoin ula leit rung jubor hapoh ka kamra shim interview bad pynsangeh ia ka interview.
Ka VPP kala pynmih ia ka jingkynnoh ba ka don ka jingbamsap, ka jingbam pisa bad ka jingbym shai ha ka jingpyniaid ia kane ka jingthungkam.
