Shillong, Nailur 30 : Ka Elekshon sha ka Iingdorbar ka Garo Hills Autonomous Distrct Council (GHADC) kan don mynta da ka electoral roll ba dei thik tang ki Scheduled Tribe ym shuh ban ioh bynta ki bar jylla hadien ba u Lat ka Jylla CH Vijayashankar ula ai jingmynjur ia ka amendment jong ka Rule pyniaid elekshon ka Council.
Ka khubor ba iajan bad ka Sorkar ka pyntip ba u Lat ula ai jingmynjur ia ka Amendment ha ka sngi Ba-ar-ka 29 tarik Nailur.
Da kane ka jingai jingmynjur, ka Sorkar Jylla ha ka sngi Balang kala pynmih ia ka jingpynbna jong ka GHADC (Second Amendment) Rules, 2026 ha ka Gazette ka Jylla.
Ka jingpynbna kan pyntreikam noh mardor ia ka amendment jong ka Assam and Meghalaya Autonomous Districts (Constitution of District Councils) Rules, 1951.
Ha kane ka ain, ka Rules 8 ka pynlong kongsan ba tang ki Scheduled Tribe kiba lah ban iakhun ia ka elekshon GHADC, Rules 128 ka kren ia ka jinglong ST na ka bynta ki nongthep vote bad Rule 129 ka ai ka lad ban pynkhreh iala ka jong ka electoral roll na ka bynta ka Council- kaba pynduh noh ia ka jingpyndonkam ia ka Electoral Roll jong ka elekshon MLA.
Kane ka sienjam kala sdang hadien ba ka GHADC kala mynjur ia ka Amendment Bill ha ka 10 tarik Nailar, hadien ka jingioh ia ka jingmynjur u Lat ha ka 6 tarik Nailar ban wanrah hapoh ka Iingdorbar Thaw Ain. Ia ka Amendment jong ka Rule 8 ba hashuwa la mynjur da ka Council ha ka 23 tarik Lber mynta u snem.
Ka Amendment kala mih hadien ba ka Iingkashari Meghalaya High Court kala pyndam ia ka jingpyn bna jong ka Executive Committee ka GHADC ba pynlong kongsan ia ka ST Certificate na ka bynta ki kyrtong, halor ka nongrim ba hap ban leh ia kane lyngba ki lynti kat kum ka Rule. Ka Council ha u Jymmang 2025 kala thaw ia ka Committee ban shong bishar ia ki kyndon pyniaid elekshon bad pynkhreh ia la ka jong ka electoral roll.
U Myntri Rangbah ka Jylla Conrad K Sangma ula iai ban ia ka jingkut jingmut jong ka Sorkar ban iada ia ka hok jong ki trai ri trai muluk haba pynpaw ba ka synshar khadar bad ka jingthaw iaki policy ka dei ban long kaba don jingkitkhlieh na ka bynta ki jaidbynriew kiba ki dei ban shakri.
Namar ka samoi treikam jong ka GHADC la pynjlan haduh ka 18 tarik Risaw hadien ba la pynjlan ia ka elekshon bala buh ban long ha u Iaiong 2026 namar ka jingkulmar kaba jia ha ri-lum Garo, ka jingpynkhreh ia ka electoral roll ba thymmai kan sa rai mynta ia ka por ban lah pynlong noh ia ka elekshon jong ka Council.
