Shillong, Nailur 28: 3 tylli ki Polytechnic hapoh Meghalaya kiba la mynjur da ka Sorkar Pdeng ha u snem 2009 kin dang ban dep pyntrei bad kawei na ki Polytechnic kaba don South Garo Hills ka dang sahdien bha ha kaba tang kumba 64-65 percent la dep ban pyntrei.
U Chairman ka Estimate Committee jong ka Iingdorbar Thaw Ain, uba dei ruh u MLA ka Nongpoh constituency bah Mayralborn Syiem u la iathuh ba ka Committee ka la pynlong ia ka jingialang bishar bniah bad ka tnad pule puthi halor kitei ki 3 tylli ki projek.
“Ngi la iakren ia ki mat ha kaba ia dei bad ki 3 tylli ki Polytechnic – kawei ha Nongkrah, Nongpoh ha Ri-Bhoi, kawei ha Nongstoin West Khasi Hills bad kawei ha Gasuapara ha South Garo Hills” la ong u bah Mayralborn.
U Bah Mayralborn ula ong ba ia ki projek la mynjur da ka Ministry of Human Resource Development bad mynta ka hap hapoh ka Ministry of Education hynrei ka jingtrei Civil Work haduh mynta la dep tang na ka bynta ka administrative block bad katto katne ki kamra klas.
“Ngi la buddien ia kane ka kam namar ba la pyllait ia ka pisa. Ngi la bishar bniah ia ka jingiaid shaphrang ha ki kam ba pyntrei bad ha ka liang ka pisa tyngka,” u la ong.
Katkum ka jingong u Bah Mayralborn, ka Nongpoh bad Nongstoin polytechnic ki la jan dep artad.
“Ki polytechnics ha Nongpoh bad Nongstoiñ ki la jan dep kumba 100 percent. Ka PWD (Building) kan aiti noh sha ka tnad pule puthi bad mynta yn sa leh sa kiwei ki kam kum ka jingpynbiang um, ka bor ding bad ban mang iaki kam. Ia ka jingtyrwa ban mang iaki kam la phah shaka Planning bad Finance ban ioh jingmynjur” u la ong.
Halor ka jingpynslem ban pyndep iaka Gasuapara, u Bah Mayralborn u la ong ba la bthah ia ka tnad ban pynkloi ia ka kam.
“Ka kam civil work ha Gasuapara ka dang sahdien ha kaba tang 64-65 percent la pyndep. Ngi la bthah ia ka tnad ban pynsted ia ki kam na ka bynta ka jingmyntoi jong ki samla pule,” u la ong.
Haba kylli shaphang ki daw jong ka jingpynslem, u Bah Mayralborn ula ong, “Ki la pyntip ba ki don bun ki jingeh, nyngkong kadei namar ka jaka. Ngi la bthah ba la mang ia ka pisa paidbah bad ia ka projek hap ban pyndep kloi katba lah.”
