Shillong, Nailur 26 : U Symbud Myntri Rangbah bad National Vice President ka NPP Bah Sniawbhalang Dhar ula kyntait ia ki khubor hamsaia ba ki MLA ka NPP kila ienglain ban leit iasoh sha ka BJP hadien ba 8 ngut ki MLA ka UDP kila iasoh sha kane ka party saffron.
U Bah Sniawbha ula ong ba baroh 33 ngut ki MLA ka NPP ki dang iatylli mlon bad ka kynhun synrop MDA ruh ka dang skhem triang.
U Bah Sniawbha uba dang shu wan phai na Delhi ha ryngkat bad u Myntri Rangbah Conrad K Sangma bad Symbud Myntri Rangbah Bah Prestone Tynsong, ula ong ba ka jingleit Delhi ka dei namar ki kam Sorkar.
“Phi la iohi ia ki khubor ba saphriang hynrei nga kwah ban pynshai ba kam don eiei hapoh ka longiing ka NPP. Ngi la iatylli pura kum ka Iing, khamtam ki lai ngut ki nongialam- Conrad K Sangma, Bah Prestone Tynsong bad Bah Sniawbhalang Dhar-Ngi don ia kawei ka jingmut jingpyrkhat” ula ong,
Ula pynman kamkai ia ka khubor ba 22 ngut ki MLA ka NPP kila iasah ha Delhi ban iakynduh ia ki nongialam ka BJP.
“Nga iohi hynnin, ki ong ba 22 ngut ki MLA ka NPP ki don ha Delhi. Nga iathuh ha phi, tang 3 ngut ki MLA ki don ha Delhi ban pyndep ia ki kam Sorkar. Nga sngew synei ia kito ki lad pathai khubor kiba buh ia kum kine ki khubor ha ki social media. Ki paidbah kin rkhie bein ia ki. Baroh 33 ngut ki MLA ka NPP ki iatylli mon. Kine ki jingkynnoh ki dei ki bym don nongrim satia” ong u Bah Sniawbha.
Halor ka jingktah ka jingleit iasoh ki 8 ngut ki MLA ka UDP sha ka BJP ia ka Sorkar MDA, u Bah Sniawbha ula ong ba kam don jingktah eiei ruh em.
“Ka jingleit iasoh ka dei ka kam hapdeng ki artylli ki seng sain pyrthei-ka BJP bad UDP. Kam long ia nga ban batai iaka kam jong ki. Kaei kaba nga kwah ban pyntip sha phi ka long ba kam don jingeh eiei hapoh ka MDA. Ka MDA kan iai neh ha ka juh ka jingdon paid. Kila kynthih na ka liang synshar sha ka liang synshar. Man ki seng sain pyrthei ki kwah ban pynkhlain ialade, kam don jingma satia kane” ula ong.
“Ngi la pyniaid ia ka Sorkar la phra snem shiteng. Naduh u 2018 haduh 2023, ngi la pyniad da 19 ngut ki MLA, mynta ngi la don 33 ngut. Nga ai khublei ia ki paralok ba iatreilang, ki dang iai kyrshan ia ngi” ula bynrap.
U Bah Sniawbha ula kyntait war ia kano kano ka jingdawa na ka BJP ban ai kham bun ka shuki ha ka kynhun Myntri.
“Kam don satia kum kata ka jingdawa na ka BJP ban pynbun ia ka shuki Myntri na kawei sha ka 4 tylli. Baroh kiei kiei ki dang iai long kumjuh” ula ong.
