Nongstoin, Nailur 24 : Ka Sorkar Jylla kala bthah ia ki Wholesaler ka West Khasi Hills ba kin wan kit hi dalade ia u khaw rashon na ka kudam ka Food Corporation of India (FCI) na Shillong tad haduh ban da pynbeit pat da kumwei.
Kane ka jingbthah kala mih hadien ka jingduh khaw rashon ki paidbah ka Nongstoin, uba dei jong u bnai Nailur namar ka jingiakajia hapdeng ka shnong Pyndengrei Nongstoin bad ka Ophis ka FCI.
Ia kane ka pynbna da u Myntri ka Tnad Food & Civil Supply & Consumer Affairs Bah Methodius Dkhar ha ka jingiakren bad ki lad pathai khubor ha ka sngi Palei ha Nongstoin.
U Myntri ula pyntip ba ia ka bai kit ia kine ki marbam, ka Sorkar kan pyrshang ban iarap katto katne ia ka jinglut ban pynsting ia ki wholesaler hynrei kaba bun hi kin hap ban kitkhlieh dalade ban lah pynpoi ia ki marbam rashon sha u paidbah tad haduh ban da pynbeit da kumwei.
U iathuh ba ka FCI ha Nongstoin ka dei ka kudam kaba ki wholesaler ka Eastern West Khasi Hills bad South West Khasi Hills ki ju wan kit ia u khaw hynrei mynta kine ki wholesaler kila mynjur ban leit kit noh sha Shillong.
U iathuh ba ki wholesaler ka WKH hi ruh kila mynjur ban leit kit noh ia u khaw na Shillong ban lah sam noh ia une u marbam sha ki paidbah.
