Shillong, Nailur 24: Ka Confederation of Meghalaya Social Organizations (CoMSO) ka pyrshah jur ia ka hukum jong ka tnat Finance Ministry ban plie ia ki bank kynthup iaki bank haki thain nongkyndong ha ka Sngi U Blei kata haka 27 tarik Nailur hashwa ka jingiakhih jong ki bank ha ka ri baroh kawei naduh ka 28-30 tarik Nailur.
U General Secretary ka CoMSO u Balkarin Ch Marak u la ong ba ia katei ka hukum la pynmih khlem da pyrkhat ia ka jinglong jong ka Meghalaya kaba bun ki riewngeit Khristan, ha kaba ia ka Sngi U Blei la pynlong kum ka sngi mane Blei bad ka sngi ia donlang shi iing shisem.
“Ka jingsuk ha ka rukom synshar kam lah ban pynduh pyndam ïa ka jingngeit ki nong shong shnong haka niam bad ka imlang sahlang jong ka Meghalaya,” u la ong bad bynrap ba ïa kane ka rai la shim khlem ka jingïamir jingmut bad kiwei ki Jylla hapoh ka ri.
Ka CoMSO ka la ong ba kam pyrshah ïa ki jingshakri ki bank khlem kano kano ka jingpynthut hynrei la dei ban wad ïa ki lad ki lynti kum ka jingpynjlan ïa ki kynta trei shwa bad hadien ka jingïakhih, ki jingshakri daka pynbun bad pynkhlain iaki kor ATM bad kiwei ki kor digital.
Kala kyntu ia ka tnat Finance Ministry, ka RBI, ki bank bad ka Sorkar Jylla ba kin pyrkhat biang bad ban pynthikna ba ki rai ba ki shim kim dei ban ktah ia ka imlang sahlang bad ki rukom leh niam jong ka jylla.
Lada ym lah ban pynbeit ia ki jingeh, ka CoMSO kan hap ban leh eiei, la maham u Balkarin.
