Nongstoin, Nailur 24 : Ki 13 tylli ki Shnong ka thain Umthli, kaba hap hapoh ka Hima Nongmynsaw Syiemshih (Langpih sector) kila rai ba “da lei lei ruh kin ym treh ban leit sha Assam” ha ka jingpynbeit ia ka jingiakajia pud hapdeng ka Sorkar Meghalaya bad Assam.
Kane ka sur ki 13 shnong kala mih na ka jingialang paidbah bala khot da ki nongialam shnong ka thain, ha Umthli hynnin ka sngi Balang ban pynpaw ia ka jingpyrshah kaba jur ia ka jingkam kawei ka news channel ka Assam, ba ong ba 95% na ki paidbah ka thain ki kwah ban leit iasoh sha Assam ha ka jingiapynbeit pud.
Ki paidbah na kine ki 13 shnong kila iamih ryntih sha kane ka jingialang paidbah ban pynpaw ia ka jingpyrshah halor kane ka jingkam, kaba la iadonlang ki dkhot ka Executive Dorbar ka Hima Nongmynsaw, ki Khlieh Nongsynshar Shnong, ka FKJGP-Rimuliang Circle bad kiwei kiwei.
Kine ki 13 tylli ki shnong ki kynthup ia ka Shnong Mawdiangkob, Talimara, Umdiangsiar, Umdiangphiang, Umthli, Umkhamdol, Dariphang, Umbah, Ukiam, Borkhuli, Hasem,Warigro, Doledonga bad kiwei.
Ki nongialam ka thain kila pynpaw ba kane ka khubor na Assam ka long kaba ialam bakla bad ka jingshisha hi ka long ba 95% na ki paidbah kim kwah satia ban leit sha Assam hynrei ki kwah ban don ha Meghalaya.
“Ki nongshongshnong ka thain kiba bun ki dei ki Jaidbynriew Khasi bad Garo…ngi don ka hok ban don ha Meghalaya” ong u President ka FKJGP Bah Serbilin Lyngdoh.
Kat kum ka jingong jong u, ka Sorkar Meghalaay bad Assam ki dei ban sngap ia ki paidbah ka thain bad ong “Ki jaka kaba ngi shong ngi sah ka dei ka ri jong ngi, ka shong jong ngi, ka khyndew jong ngi, ka mon bad ka jingjied ruh ka dei ban dei jong ngi. Kumta ym don hok mano mano ruh ban tuklar khamtam ka Assam kam dei ban shu iai pynbor ia ka mon u paidbah”.
Ula ong ba ka Sorkar kam dei shuh ban nang pynslem ia ka jingiakren pynbeit pud bad ka Assam bad ban pynthikna ba ka thain ka dei ban hap hapoh ka jingsynshar ka Jylla Meghalaya kat kum ka jingkwah ki nongshongshnong.
