Shillong, Nailur 23: U Nongialam ka BJP bad Myntri ka Sorkar Pdeng Kiren Rijiju ha ka sngi Balang, ula ong ba ka thain Shatei Lam Mihngi kala mad ia ka jingshah lehbein hapoh ka jingialam ka Sorkar Congress, kaba la leh bym suidniew ia ka thain namar ka jingbym don bun ngut ki MP bad MLA.
Haba pdiang sngewbha ia ki 8 ngut ki MLA ka UDP na Meghalaya sha ka BJP ha New Delhi, u Rijiju ula ong ba u Myntri Rangbahduh ka ri u Narendra Modi ula pynkylla ia ka politik jong ka thain shatei lammihngi da kaba kdup ia ka thain.
“U Myntri Rangbahduh ka ri ula pynkylla ia ka politik. Ngan ai ha phi ia kawei ka nuksa. Ha ki por mynshwa, ka Congress ka ju leh ia ka thain North East kum ka jaka kaba don sha kyndong kynshrot” ong u Rijiju.
“Ki jylla ha ka thain North East kidei kiba rit, ki don ki jylla kiba don tang 2 ngut ki MP, don ki jylla kiba don tang uwei u MP lait noh ia ka Assam kaba don 14 ngut ki MP. Ngi lah mad ia ka jingshah niewbein ha ka por jong ka jingsynshar ka Congress” ula ong.
Ula kam ba ha ka jingsynshar ka Congress, ki Myntri Rangbah ka thain North East kila mad ia ka jingshah pynkhlemrain.
“Haba pynkynmaw ia ki por jong ka Congress, ki Myntri Rangbah ka thain North East kila mad ia ka jingshah pynkhlemrain. La bthah ia ki hakhmat jong ki jingialang paitbah ba kidei ban kren tang khyndiat namar ba ki don tang khyndiat ngut ki MP bad ki MLA” ong u Rijiju.
“Bun ki Myntri Rangbah hakhmat jong ki jingialang paitbah jong ka Congress, kila shah ong, ba kidei ban kren lyngkot namar ba ki don duna ia ki MP bad MLA. Kane kadei ka jingshah pynkhklemrain, ka Congress kala shim ba ka thain North East kadei tang ka jylla bad ka thain ka bym don jingmut eiei ha ka politik” ula ong.
U Rijiju ula ong, ba u Myntri Rangbahduh ka ri u Modi, ula leh mar khongpong ha kaba um shim la khein eiei ia u nombar.
“Ha kawei pat ka liang, u Myntri Rangbahduh ka ri u Narendra Modi, um shim la khein eiei ia u nombar. U Myntri Rangbahduh ka ri ula kdup da ka jingjan ia ka thain North East ha ka mynsiem ka jongu” ula ong.
Haba pynshai halor ka PM Outreach, ula ong, “U Myntri Rangbahduh ka ri ula wan jngoh palat ia ka 80 sien. Ngam kren halor ka jingwan ialap elekshon. Palat ia ka 80 sien kum u Myntri Rangbahduh ka ri na ka bynta ki kam pynroi bad ban pyniasoh bad ka thain North East. U Myntri Rangbahduh ka ri ula bthah ia ki Myntri ka Sorkar Pdeng ba kidei ban leit jngoh ia ka thain shatei lammihngi shisien ha ka 3 bnai bad 15 ngut ki Myntri kidei ban poi man la ka bnai, ka thain North East ka ju long ka jaka leit ia ki myntri sorkar bad kane kan iai bteng”.
“Ka politik baroh kawei kala kylla hapoh ka jingialam u Modi bad mynta ka thain North East kam dei shuh kaba la shah ieh ne shah kyntait bad dei halor kane ba 8 ngut ki MLA kila wan ban rung sha ka BJP. Ka BJP kadei ka longiing kaba heh. Ngi dei ka seng sain pyrthei kaba heh tam ha ka pyrthei” ong u Rijiju.
