Pur ka khana ban leit iasoh NPP sa 3 ngut ki MLA ka UDP
Shillong, Nailur 23 : Da ka jingkiew kynsan ka Bharatiya Janata Party (BJP) ha ka jingdon MLA sha ka 10 ngut na ka jing wan iasoh ki 8 ngut ki MLA ka UDP ha ka sngi Balang, ka Sorkar Meghalaya Democratic Alliance-II (MDA-II) ka lah ban sakhi ia ka jingpynkylla ha ka jingiasam bhah ha ka Kynhun Myntri kaba la khmih lynti ban jia ha kano kano ka por.
Baroh ki khmat mynta kila phai sha u Myntri Rangbah ka Jylla Conrad K Sangma, uban hap pyrkhat thymmai ia ka bhah shuki Myntri khamtam ka bhah jong ka United Democratic Party (UDP) kaba ju ioh artylli baroh shikatta hynrei mynta kala sah satang kawei-kaba la leit noh sha ka BJP.
Da ka jingdon haduh 10 ngut ki MLA, ka BJP la khih lynti ba kan kyntur ban ioh kham bun ka bhah ha ka Kynhun Myntri jong ka Sorkar u Conrad K Sangma. Ia mynta ka BJP ka don tang uwei u Myntri ha ka Sorkar-u Bah Sanbor Shullai uba bat ia ka tnad Animal Husbandry & Veterinary, Arts & Culture, Legal Metrology bad Printing & Stationery.
Ka khubor ba ioh lum ka pyni ba ka BJP ka lah ban pan sa artylli ki bhah shuki Myntri hadien kane ka jingkiew ha ka jing don MLA, watla ka jingiakren ka lah ban kot sha ka 3-4 tylli ki shuki.
Ka United Democratic Party (UDP) ka dei kaba duhnong eh ha kane ka jingkylla ka sain pyrthei…nalor ka jingduh haduh 8 ngut ki MLA, ka shuki Myntri kaba bat da u Bah Lahkmen Rymbui (uwei na ki MLA ba pyniasoh BJP), kala artatien ba kan leit phai biang sha ka UDP kaba la sah satang 4 ngut ki MLA.
Napdeng ki 8 ngut ki MLA barim ka UDP, u Bah Lahkmen Rymbui la khmih lynti ba un nang bteng ban bat ia ka shuki Myntri. U Bah Lahkmen uba la iasoh sha ka BJP,u bat mynta ia ka Tnad Education, Information & Public Relation, Law bad Revenue Disaster Management.
Kawei pat ka kyrteng kaba la mih ha ka jingiakren ka dei u Myntri barim ka UDP Bah Kyrmen Shylla. Ka khubor ka pyni ba u bah Kyrmen u lah ban wan phai biang sha ka Kynhun Myntri bad bujli ia u President ka UDP Bah Metbah Lyngdoh.
Lada kane ka wan jia, kan dei kawei na ki jingkylla kaba heh hapoh ka Sorkar hadien ka jingkynthih seng ki 8 ngut ki MLA ka UDP sha ka BJP.
Hynrei, ka khubor ka ong ba ka jingiakhein iadiah ka dang iaid haba iadei bad ki jingpynbeit ia ka bhah ha ka kynhun Myntri.
Kane ka jingkylla ka sain pyrthei lada ka long kumno kumno ruh, kam buh satia ia kano kano ka jingma ia ka Sorkar ba ialam ka NPP. Ka NPP don lypa ia u nombor ba kot 32 ha ka iingdorbar ba 60 ngut ki dkhot.
Ka jingtynjuh mynta ka long, ym halor ka jingneh jong ka Sorkar hynrei ka jingialah pynkohnguh ban pynbeit thymmai ia ka jingiasam shuki hapdeng ki paralok ba don ha ka kynhun synrop.
Na ka bynta ka UDP, ka jingjia sngi Balang kala ieh ia kane ka party riewlum ban duhnoh ia ka kyrdan kum ka seng riewlum ba bun paid eh bad sah mynta satang 4 ngut ki MLA ba kynthup ia u bah Metbah Lyngdoh, Bah Paul Lyngdoh, Bah Nujorki Sungoh bad Bah Renikton Tongkhar.
Kane ka jingpait ka lah ban pyntlot ia ka kyrdan ka UDP hapoh ka MDA bad pynkhlain pat ia ka BJP ha ka jingiapynbeit ban don ha ka bor.
Ka jingkylli kaba mih mynta ka long ba kaei ka ban jia ia ki 4 ngut ki MLA ka UDP ba dang sah hashuwa jong ka elekshon MLA 2028.
Kila don mynta ki jingiakren ha ka jylli sain pyrthei ba kane ka seng riewlum ka lah ban nang stait shuh shuh, ha kaba katto katne na ki MLA ba dang lah ki lah ban leit iasoh noh sha ka NPP. Hynrei ia kane ym pat lah ban pynthikna bad ka dang dei tang ka jingiakren ha kane ka khyllipmat.
