Shillong, Nailur 23 : Ka United Democratic Party (UDP) kala duh noh ia ka kyrdan kum ka seng riewlum ba heh paid duh ha Meghalaya hadien ba 8 na ki 12 ngut ki MLA kila leit iasoh sha ka Bharatiya Janata Party (BJP) ha ka sngi Balang.
Ka jingdon MLA ka UDP mynta kala hiar sha ka 4 ngut.
Kine ki 4 ngut ki MLA ba sah ki dei u President ka UDP bad Myntri Sorkar Bah Metbah Lyngdoh, u MLA ka West Shillong Bah Paul Lyngdoh, u MLA ka Mawkyrwat Bah Renikton Lyngdoh Tongkhar bad u MLA ka Mookaiaw Bah Nujorki Sungoh.
Ki 8 ngut ki MLA kiba la kynthih seng ki dei u Bah Lahkmen Rymbui (Amlarem), Kyrmen Shylla (Khliehriat), Mathew Beyondstar Kurbah (Mawphlang), Synshar Kupar Roy Lyngdoh Thabah (Sohiong), Balajied Kupar Synrem (Shella), Mayralborn Syiem (Nongpoh), Pius Marwein (Ranikor) bad Bah Olan Sing Suin (Mawsynram).
Kine ki 8 ngut kila dep pyniasoh sha ka BJP ha ka jingialang ba long hapoh ka Headquarter ka BJP ha New Delhi ha ka jing ia don ryngkat u Myntri ka Sorkar Pdeng Kiren Rijiju, u Nongaiktien ka party Sambit Patra bad u President ka BJP Meghalaya Rikman G Momin.
Kane ka jingiasoh kala wan jia hadien ba ki nongialam ka BJP kila kular ban leh eiei noh halor ki saw tylli ki mat jingdawa ba kongsan jong ka Jylla-ka jingpynrung ia ka ktien Khasi ha ka Khyrnit ba Phra, ka jingpynkynriah ia ka Them Metor na Them Iew Mawlong, ka jingpynjynsur ia ka kam tih dewiong bad ka jingpynkylla ia ka Meghalaya Residents Safety and Security Act (MRSSA) ban tehlakam ia ka jingrung kyrthep ki briew ba nabar sha Jylla.
Da kane ka jingiasoh, ka BJP mynta kala kiew ha ka jingdon MLA na ka 2 ngut sha ka 10 ngut hapoh ka Iingdorbar Thaw Ain ba 60 ngut ki dkhot ka Jylla.
Da kane ka jingnang bun paid, ka BJP kala khmih lynti ban ioh kham heh ka bhah ha ka Sorkar MDA, kaba la pynmih ia ka jingantad ba kan sa don ka jingbujli shuki Myntri.
Kane kala wanrah ia u lyoh ba dum haba phai sha ka lawei jong ka UDP hapoh ka Sorkar MDA ba ialam u Conrad, kaba la pynmih ia ka jingkylli la ka UDP kan dang ioh bat ia artylli ki shuki Myntri.
