Shillong, Nailur 23 : U Myntri ka Sorkar Pdeng Kiren Rijiju ha ka sngi Balang ula shim ia ka jingwan iasoh ki 8 ngut ki MLA ka UDP sha ka BJP kum ka por kaba batai shai na ka bynta ka Meghalaya bad ka thain Shatei Lam Mihngi, haba pynpaw ba kane kan nang pynkhlain shuh shuh ia ka Sorkar MDA ba ialam da u Conrad K Sangma.
Haba pdiang ia ki MLA ha ka jingialang ha Headquarter ka BJP ha New Delhi, u Rijiju ula ong ba ka jingdon MLA jong ka BJP kala kiew sha ka 10 ngut ha Meghalaya bad kan pynthikna ia ka jingiatreilang kaba kham bha shuh shuh bad ka kynhun synrop ba synshar ia ka Jylla.
“Naduh mynta ka Sorkar ba ialam da u Conrad K Sangma ha Meghalaya, kaba dei ka Sorkar MDA, kan nang khlain shuh shuh namar ka jingdon nombor ka BJP kala kiew. Ngin nang don ia ka jingiatreilang ba kham bha, kham sngewthuh jing mut bad pynsted ia ki jingpyrhang jong ngi ban pynroi ia ka Meghalaya” ula ong.
U Rijiju ula pynpaw ba u donbok eh ban long shi bynta jong kane ka jingialang kum u nongialam na ka thain Shatei Lam Mihngi bad u Myntri ha ka Sorkar u Modi.
“Kum u briew na ka thain Shatei Lam Mihngi bad kum u Myntri ha ka kynhun Myntri u Modi, Nga sngew donbok bad sngew kmen ruh ban iadonlang ha kane ka jingwan iasoh ki MLA ka Meghalaya. Ka long kaba kongsan bha na ka bynta ka histori sain pyrthei jong ka thain Shatei Lam Mihngi, ka lynti iaid ka sain pyrthei ka Meghalaya”ula ong.
“Nga ai khublei ia baroh ki 8 ngut ki MLA namar ka jingnud ban shim ia kane ka rai kaba kongsan ban wan iasoh sha ka BJP” ula ong.
U Myntri u ong ba kine ki MLA kila wan iasoh namar ka jingkylla jong ka thain Shatei Lam Mihngi hapoh ka jingialam u Myntri Rangbah Duh Narendra Modi ha kine ki 12 snem bala leit noh.
“Baroh 8 ngut ki MLA ba pawnam na Meghalaya kila iasoh sha ka BJP. Ka dei ka jingjia ba kongsan bha ha ka sain pyrthei ym tang jong ka thain Shatei Lam Mihngi hynrei jong ka Ri. Nga pdiang naduh ka mynsiem ia baroh kine ki paralok, ki MLA ka Meghalaya” ong u Rijiju.
