Shillong, Nailur 21: Ka jingthut ka jingpynpoi khaw sha ka thain West Khasi Hills kaba la neh shibnai na ka daw ka jingshah khang ki trok kit khaw ban leit pynhap sha kudam FCI ha Pyndengrei, ka lah ban kut noh da ka jingmynjur ki nongdie (wholesaler) ban kit noh ia u khaw na Shillong.
U Myntri ka tnat Food and Civil Supplies u Bah Methodius Dkhar ha ka sngi Nyngkong u la bishar bniah ia ka jinglong jingman jong ka jingpynpoi khaw bad ki nongdie (wholesalers) jong ka West Khasi Hills, South West Khasi Hills bad Eastern West Khasi Hills haka jingdonlang u Deputy Commissioner, West Khasi Hills bad ki ophisar ka tnat FCI.
“Ha ka shibnai ba la dep ka la don ka jingshah pynthut ki trok ban wan pynhap khaw ha Pyndengrei FCI godown ha Nongstoiñ kaba shatri iaki lai tylli ki district. Ngi la bthah ïa ki nongdie ba kin kit noh shipor ia u khaw na Shillong bad na Sohryngkham,” la ong u Bah Methodius.
U Bah Methodius ula kam ba ki nongdie ha West Khasi Hills ki pynpaw ia ka jinglut kaba heh haba ki leit kit khaw na Shillong.
“Ngi la don ka jingiakren kaba bniah mynta ka sngi bad ngi la kyrpad ba kin leit kit noh ia u khaw jong u bnai Nailur na Shillong, Sohryngkham ne wat na Williamnagar lada ka kham jan. Ki la mynjur ban leit kit noh ia u bhah jong mynta u bnai ha kane ka taiew,” u la ong.
U Myntri u la ong ba ki nongshong shnong kin sa ioh kloi ia u khaw jong mynta u bnai namar ba ki don ki jaka ki bym shym la ioh khaw la shibnai namar ka jingshah pynthut ki trok ban wan pynhap khaw ha FCI Nongstoin.
Haba batai ia ka daw, u Bah Methodius u la ong ba ka dorbar shnong ka la pyrshah ia ki trok ban iaid naka surok ban poi sha FCI depot.
“U Rangbah Shnong bad ka Committee ki pynpaw ba ki trok kin pynjulor ia ka surok ban poi sha FCI depot kaba don ha Pyndengrei. Ki la don ki jingpyrshang na ka PWD bad ka tnat ban pynthikna ia ka jingmaramot iaka surok hynrei ki dang tieng ioh sniew shuh shuh ka surok” u la ong.
U la bynrap ruh ba ka tnat ka dang iatreilang bad ka dorbar ban maramot ia ka surok bad ban sdang biang ia ka jingwan kit khaw sha FCI Pyndengrei.
