Shillong, Nailur 21 : Ka Khasi Students’ Union (KSU)-Central Executive Committee (CEC) ha ka sngi Nyngkong, kala ai da ka legal notice ia u Superintendent of Police (Shillong City) Bah Dangsan Khyriem, MPS namar ka jingkynnoh ia ka KSU halor ka jingshah tynrah scooty u Superintendent of Police (Traffic) Hari Prasant.
U Hari Prasant ula shah tynrah ha ka scooty ba niah ki arngut ki samla ha ka 18 tarik Nailur hajan ka Samkhamti Petrol Pump, Urkaliar. Ki pulit ha ka jingpynlait khubor, kila pyntip ba ki suba jur ba kine ki samla ki dei ki dkhot ka KSU.
Kat kum ka kyrwoh na u Information & Publicity Secretary samla Pynshai Kupar M Dkhar, la iathuh ba ia kane ka legal notice la phah lyngba u muktiar ka seng haka kyrteng jong ka KSU Central Executive Council (CEC).
Ka KSU ka pynpaw ia ka jingsngewkhia halor ki jingkynthoh bad jingkynnoh kiba la mih ha ki lad pathai khubor ba pyniadei ia ki arngut ki samla ba shah kem ba ki dei ki dkhot ka seng.
Kat kum ka legal notice, ka KSU ka dawa ia une u Ophisar MPS ba un pynshai halor ka nongrim bad ka jingpynshisha halor ka jingpyniadei ia kine ki briew ba shah kem bad ka KSU hakhmat u paidbah lyngba ki lad pathai khubor.
Ka KSU kala aipor 15 sngi ia une u Heh Pulit naduh ka sngi ba u ioh pdiang ia ka notice ba un panmap paidbah ha ki lad pathai khubor sha ka KSU bad ban sangeh lem bad ban ym pynmih shuh ia kum kine ki jingkynnoh ba bakla, kiba khlem pat lah ban pynshisha ne kiba pynjah burom ia ka KSU.
Ka Legal Notice ka pynbna ruh ba lada une u Heh Pulit um pyndep ïa kine ki jingdawa hapoh ka por ba la buh, ka KSU kan hap ban shim ïa ki sienjam kiba biang ha khmat ka aiñ, kynthup ïa ka criminal proceedings katkum ka aiñ, halor ki jingkynnoh ba ki jingkynthoh kiba pynsniew nam iaka seng baroh kawei.
Ka Union ka pynpaw shai ba ka burom ïa ka jingtohkit bad ïa ka jingtreikam jong ka Ïingbishar halor ka jingjia jong ka 18 tarik u Nailur 2026. Hynrei, ka jingpyndonkam ïa ka aiñ ka dei ban long kaba ïaryngkat ïa baroh bad ki jingkynthoh paidbah na ki bor pulit na ka sorkar bad kiba dei peit ki dei ban shong halor ki jingshisha kiba la pynshisha bad ki sakhi kiba biang.
Ka KSU ka pynshai ba kane ka jingai legal notice kam dei satia ka jingpyrshang ban khanglad ia ka jingtohkitjong ki Pulit ne ban ktah ia ka jingbishar halor ka jingjia ba 18 tarik Nailur.
Namarkata, ka KSU ka dawa ïa ki bor pulit bad ka sorkar kiba don bynta ba kin ai jubab bad pyndep ïa ki jingdawa hapoh ka 15 sngi katkum ba la kdew ha ka Legal Notice. Lada ym don ka jingpynbeit hapoh kane ka por, ka seng kan shim ïa ki sienjam kiba kham eh shuh shuh katkum ka aiñ kiba don ha ka kti jong ka.
