Shillong,Nailur 17 : Ka Tnad Pulit kala pynkhlain ia ki lad pahara ha kylleng ka sor Shillong hadien ka jingshah kawang 4 tylli ki petrol bomb ki Ophis Sorkar bad ki Police Station.
U Superintendent of Police (Traffic) ka East Khasi Hills Hari Prasanth MR ula ong ba kine ki kam kawang petrol bomb kila jia ha ka sngi Balang ha Ophis ka DMR ha ka por 3:30 baje janmiet, ka Lumdiengjri Police Station ha ka por 9:45 baje mynmiet bad ha ka step sngi palei ha DHS ha ka por 3 baje mynstep bad ha Nongmynsing Traffic Beat ha ka por 3:30 baje mynstep.
U iathuh ba la pynjur mynta ia ka jingiaid pahara da ka kjat bad ka jingtalasi kali ha kylleng ka sor nalor ka jingpynbun ia ki Pulit ha kylleng ki jaka khamtam ha ki Ophis Sorkar kiba don sha ki jaka ba kynjah.
“Ngi la shim ia ki sienjam, ngi la pynkhlain ia ka jingiaid pahara, ngi la pynjur ia ka jingtalasi kali. Ngi la buh kham bun ki Pulit. Ngi la dep kren ruh ia baroh ki Ophis bad bthah ia ki ba kin pyntip ia kiei ki jingdonkam khnang ba ngin lah ban pynkhreh kham bha” ong u Prasanth.
U iathuh ba ka jingtohkit mynta kala iaid shaid shaid halor kine ki jingjia,
“Ngi dang bishar ia baroh ki video ba ring ki kor CCTV. Ngi la khot ruh ia katto katne ki briew ban pynlong ia ka jingtohkit. Ngi la lap ia katto katne ki briew bad ngi dang khmih bniah ia ka jaka ba ki don” ula bynrap.
