Shillong, Nailur 12: U nongialam barim ka UDP bad riew pawkhmat ha ka sain pyrthei Dr Jemino Mawthoh ha ka sngi Saitjain, u la leit pyniasoh sha ka Bharatiya Janata Party (BJP), da kaba ong ba u la jied ia katei ka party hadien ba u la bishar bniah ia ka sain pyrthei ha Meghalaya bad ha ka ri baroh kawei.
Haba kren sha ki lad pathai khubor u Bah Jemino ula ong ba ka BJP ka ieng na ka bynta ka synshar paidbah, ka jingshakri para briew, bad ka sain pyrthei kaba da pynshong nongrim.
“Nga sngew ba mynta hi ka BJP ka dei ka Party kaba biang eh bad ka dei kala pynlong ia nga ban jied iaka” ong u Bah Jemino haba bynrap ba um shym la iohi da kawei pat Party ki ban don ia kane kajuh ka nongrim.
U la ong ba na ka rukom treikam jong ka BJP kaba la sakhi ha baroh kawei ka ri India kala pynlong ia u ban ban rai iasoh noh bad kane ka Party.
“Nga thikna ba kan sa don ka jingkylla ha u snem 2028 haka sain hima sima hapoh Meghalaya ha kaba ka BJP kan ialam hi iaka Sorkar Jylla” ula ong.
U la kren ruh shaphang ka jingshaniah jong ka Meghalaya ha ka jingkyrshan pisa na ka Sorkar Pdeng ban kyntiew iaka roi ka par hapoh ka Jylla bad u la ai khublei ïa ka Sorkar Jylla ba mynta kaba pyntyllun shaid shaid iaki kam pynroi kiba la bei tyngka daka Sorkar Pdeng.
U Bah Jemino ula ban jur iaka jingdonkam ban pynkhlain iaka BJP ha Meghalaya naka bynta ban pyniajan iaka jingiatreikam hapdeng ka Sorkar Jylla bad ka Sorkar Pdeng.
U la ong ba ka Meghalaya ka don ia “ki spah ba la buhrieh” ha ki bynta ba kynthup ia ka pule puthi, ki marpoh khyndew bad ter ter.
Ula pynpaw ia ka jingkyrshan ban pynkhlain ia ki polisi kiba thmu ban pynsuk ia ka kam khaii bad ban thaw ia ki lad ki lynti naka bynta ka ioh kam ioh jam ki samla jong ka Jylla.
