Yn pyntreikam noh ia ki Facilitation Centre hapoh u Nohprah
Shillong, Nailur 08 : Ka Sorkar Meghalaya kala mynjur ban ban nym pyndon bynta ia ki Ophisar ka East Jaintia Hills ha ka Fact-Finding Committee bad ban pyntreikam noh ia ka Facilitation Centre ka MRSSA ha ki sdang taiew u bnai Nohprah, iathuh u General Secretary barim ka KSU samla Donald Thabah ha ka sngi Ba-ar.
U samla Donald ula pyntip ia kane hadien ka jingialang buddien bala pyniaid da u Chief Secretary ka Jylla Dr Shakil Ahammed halor ki 5 tylli ki mat jingdawa bala pynsngew da ka KSU hakhmat u Myntri Rangbah ka Jylla Conrad K Sangma.
“Ka jingialang mynta ka sngi ka dei kaba la khot da ka Sorkar ban buddien ia ka jingialang ba dang shu dep bad u Myntri Rangbah lem bad u Symbud Myntri Rangbah. Ngi la iakren ia ka jingiaid ki kam halor ki 5 tylli ki mat bad pynpaw ia ka jingkyndit halor ka rukom buh jingthoh ia ki jingiakren jong ka jingialang bala dep” ula ong.
U samla Donald ula ong b aka minutes jong ka jingialang bad u CM kala pynpaw bakla ba u Deputy Commissioner bad Superintendent of Police ka East Jaintia Hills kin shim ia ka bynta kaba kongsan bha ha ka Fact-Finding Committee.
“La ia mynjur ba u DC, SP bad kiwei ki Ophisar ka EJH kim dei ban ioh bynta eiei ruh em ha ka Fact-Finding Committee. Ngi la pyrshah ia kane ka minutes. Ka Sorkar kala mynjur mynta ba kin nym don bynta shuh ha kano kano ka rukom ruh. Iaka Committee la dep ban thung bad ia ki jingtip ba bniah yn sa ai ha kine ki shisngi lane arsngi ban wan” ula ong.
Halor ka Meghalaya Residents Safety and Security Act (MRSSA), u samla Donald ula ong ba ka Sorkar kala pyntip ba ka Facilitation Centre ha Umling bad Ratacherra bad ki District Task Force kin sa sdang treikam noh ha ka taiew ba khatduh u Naiwieng lane taiew ba nyngkong u Nohprah.
U iathuh ba ka KSU ka pyrshah ia ka jingpynshisha online ia ki nongshongwai bad dawa ban aiti ha ki khlieh nongsynshar ban leh ia kane ka kam.
“Ngi pyrshah ia ka jingpynrung kyrteng online ia ki nongshongwai. Ngi don ka jingsngew ba ia ki briew bym ithikna dei ban pynshisha da ki khlieh nongsynshar kum ki Syiem, Sordar, Rangbah Shnong, Waheh Shnong, Nokma bad kiwei kiwei. Kila mynjur ia kane” ula ong haba bynrap ba ka Sorkarkala mynjur ruh ban pyntreikam noh ia ki Facilitation Centre hashuwa ka jingpynmih ia ka Application ban pynithuh da ka durkhmat.
Halor ka Migrant Workers Act, u samla Donald ula ong ba ka Tnad Labour kan sa pynlong ia ka workshop ha ka sngi Balang ban ai jinghikai ia ki nongtrei.
“Kila kular ba ki kyndon jong ka Inter-State Migrant Workmen Act, kynthup ka jingpynrung lang ia ka CCTNS bad ki kuna, yn sa pynrung lang noh. Kiba pynkhein nyngkong ia ka ain kin ngat ha ka kuna ba T.10,000, ba arsien T.20,000, ba lai sien T.50,000 lem bad ka shong phatok” ula ong.
Halor ka jingpynkylla ha ka thungkam thungjam, u iathuh ba ki SOP kila don mynta bad lah dep ruh ban pynduh ia ki interview ha ka thungkam Grade-D, katba ia ka rai halor ki kam technical non-gazetted Grade-B bad C la khmih lynti ban leh ha kane ka shitaiew ne artaiew duh.
Halor ka NEIGRIHMS, u samla Donald u iathuh ba ka KSU kala dawa ba ym dei ban thung ia ka ka Governing Council katba ym pat lah pyntreikam ia ki jingdawa, ka nongrim kaba la kyrshan ruh da ki bor pyniaid ka Institute.
“Wat u Deputy Director ka NEIGRIHMS ula thoh sha nga bad sha ka Sorkar ba ym pat dei ban thung ia ka Governing Council katba ym pat pyntreikam ia ki jingdawa ka KSU” ula ong.
U samla Donald u bynrap ba la iohi ba kila don ki kam bala leh halor ka MRSSA bad ka jingpynkylla ha ka thungkam thungjam, bad ka Sorkar kala kular ban sa ai ia ki jingtip ba bniah hapoh ka shitaiew.
