Shillong, Nailur 08 : U Myntri Rangbah Conrad K Sangma ha ka sngi Ba-ar, ula pynkup burom ia ka khlur ialehkai phutbol ka Jylla samla Sanfida Nongrum da ka khusnam “Achiever of the Month”- kum shibynta ka jingithuh ia ka synniang sha ka kynhun ialehkai ka ri India.
Haba ai jingkren ha ka jingialang, u Myntri Rangbah Conrad K Sangma ula iathuh ka jingthmu jong ka prokram “Achiever of the Month” bad ong ba ka dei ka jingai jingithuh ia ki jingjop jong ki nongialehkai ha ki jingialehkai bapher bapher ban ioh ka jingithuh, ka jingkyrshan, ka jingsngewthuh, ka jingai mynsiem bad ka jingiaroh ia ka jingtrei shitom jong ki.
Ula pyntip ba ka kam ialehkai ka dei ka kam ba kongsan bha na ka bynta ka Sorkar da ka jingkynshew bha ha kane ka kam bad ka jingnang pynheh ia ka mang tyngka.
“Katto katne snem mynshuwa, ka kam ialehkai kala mad ia ki jingtynjuh bad ki jingeh ha kaba ki Sports Association kila pyniaid ia ki kam jong ki da ka jingieid bad jingsngewtynnad ia ka jingialehkai tang da ki jingiarap ba khyndiat ne khlem ki jingiarap na ka Sorkar” ula ong.
Ula pyntip ba ka Sorkar kala lah ban weng bad pynbeit ia ki katto katne ki jingeh ha ka Tnad Sports da ka jingkynshew ym tang ha ki jingtei ia ki madan ialehkai ha kylleng ka Jylla hynrei ban kyrshan ruh ia ki Sports Association, ki Coach bad ki riew shimet haba bynrap “Ka Sports Policy ka Jylla kam dei tang ka kot policy hynrei ka jingiohi jngai ka ban iarap bad btin lynti ia ngi ban jam shakhmat ba ngin kynjoh ia ka thong”.
U Myntri Rangbah ula ban biang ia ka jingaiti lut jong ka Sorkar sha ki samla ka Jylla da kaba ong “Man ki prokram ba ngi don, man ka pisa ba ngi pynlut kam dei satia ka jingpynlut hynrei ka jingkynshew ia ka lawei jong ka Jylla kata ia ki samla jong ngi”.
Haba ai khublei ia ki nongjop (achievers) ha ki kam ialehkai, u Myntri Rangbah ula ong ba ka kam ialehkai ka iaid palat ia ka jingjop takma lane jingithuh bad bynrap “Ka jingialehkai ka dei ka rukom im ia ka jingim bad ka lynti iaid jong phi kam kut hangne bad nga pynshlur ia phi ban ialam da ka nuksa”.
U Myntri Rangbah ula iakren ruh bad ki nongialehkai, ki coach bad ki nongmihkhmat na ki sport association ha kane ka jingialang. U Myntri Rangbah ula jubab ia ki jingkylli bad ki jingai jingmut halor ka jingkyrshan ia ki nongialehkai ba kin leit iashimbynta ha ki lympung ialehkai hapoh ka ri bad shabar ri bad ki jingai jingmyntoi ia ki nongialehkai ba ioh khur takma nalor kiwei kiwei.
Haduh 46 ngut ki nongialehkai ba wanrah takma ha ki jingialehkai bapher bapher la pynkup burom ha kane ka prokram.
