Shillong, Nailur 5: U Vice-President ka India un buh ia u mawnongrim na ka bynta ki 5 tylli ki projek kiba kongsan kiba kot T.1,011 Klur ha ki ar sngi kiba un don hapoh ka jylla Meghalaya ha ka 7 tarik u Nailur.
Yn pdiang burom ia u Vice-President ha ka jingialang paitbah kaban long ha Soso Tham Auditorium, Shillong ha ka Lah Sngi u Blei ha ka por 4:15 janmiet ha kaba un buh ia u mawnongrim jong ki projek ha ka jingdonlang u Myntri Rangbah ka Jylla u Conrad K Sangma bad u Chief Secretary u Dr Shakil P Ahammed.
Ha kane ka jingpdiang, yn pyninam ruh ia ki kolshor jong ki jaidbynriew Khasi, Garo bad Jaintia.
Ka Projek kaba heh tam kadei kaba T.850.58 Klur jongka New Shillong Water Supply Scheme Phase-II hapoh jongka Urban Challenge Fund, kaban pynthikna ia ka jingsam um kaba baroh 24 kynta na ka bynta ka New Shillong City bad ki 32 tylli ki shnong kiba marjan kaba ka jingdon ki nongshong shnong kala long palat ia ka 4.34 lak ngut, da kaba pyndonkam ia ka Smart Metering bad Real-Time Monitoring.
Kane ka Package ka kynthup ruh ia ki artylli ki lad pyniasoh hapoh jongka NESIDS ka jingkieng kaba 110 metre halor ka Wah Umngot ha ka surok Jongksha-Kharang kaba kot T.21.86 Klur ban pyniasoh ia ki shnong kiba don sha jngai jong ka Mawkynrew Block bad ban thaw ia ka lad ban pyniasoh bad ka Shillong-Jowai bad ka surok kaba 13.5 km na Umsen sha Barapathar ha Ri-Bhoi kaba kot T. 56.01 Klur ban pynkhlain ia ki lad pyniasoh bad ka Assam bad ban kyntiew ia ki jaka jngohkai kum ka Chibra Falls.
Yn buh ruh ia u mawnongrim ban tei ia ka 30 Bedded AYUSH Hospital ha Shillong Civil Hospital kaba kot T.10 Klur ban ai ia ka jingsumar kaba paka bad T.72.5 Klur ban buh ia ka 132/33 KV Substation ha Mawkhanu kaban don ia ka Double-Circuit Transmission Line na Saisiej hapoh jongka PM-DevINE ban pyndap ia ka jingdonkam ia ka bording ha New Shillong.
Ia baroh kitei ki 5 tylli ki projek lah dep ban khot Tender bad lah iohi ba ki long kiba kongsan bha na ka bynta ban kyntiew ia ka roi ka par ha ka New Shillong City kaban long ka lawei jong ka jylla ha ka jingdon ia ki ophis sorkar bad ka jaka pdeng jong ka khaii pateng.
