Shillong, Nailur 04 : U nongialam ka UDP Bah Paul Lyngdoh ha ka sngi Palei, ula pynthikna ba ka don ka jingbynniaw kaba jur hapdeng ki MLA hapoh ka party namar ka jingohi ia ki dak ki shin ba ka party ka nang noh arsut ha ka jaka ba kan kiew.
Kane ka jingkynthoh une u MLA ka West Shillong kala mih ruh ha ka por ba pur ki khana thmu leit iasoh ki 9 ngut na ki12 ngut ki MLA ka party sha ka BJP.
Kat kum ka jingong jong u, kane ka jingbynniaw jong ki MLA kala mih na ka jingbym iohi ia ki dak ki shin ba ka party kan kiew bad ka lynti iaid jong ka.
U pyntip ba ula kren ia kane ka kam ha ka jingialang ka General Executive Council jong ka UDP ba long ha ka taiew balalah, ha kaba bun ki nongialam kila pynpaw ia ka jingsngewkhia ba ka party kam shym la kiew satia bad shu sahkut beit hajuh.
“Kane ka jingbynniaw hapdneg ki MLA ka dei kaei kaei kaba ma Nga hi nga la kren” ong u Bah Paul haba bynrap ba dei kine kiei kiei kaba pynlong ia ki MLA ba kin peit pat sha kawei ka lynti iaid.
U pyntip ba ula pan ruh ia ka kaiphod treikam jong ki arngut ki Myntri Sorkar na ka UDP hadien ka jing bujli Myntri ha u Nailur 2025, ka ban sa dap shisnem pura mynta u bnai.
Kat kuum ka jingong jong u, ka jingbym shai ha ka lawei ka party kala pynlong ia bun ki MLA ban sngew artatien bad pynlong ia ki ban peit pat sha kiwei ki lynti iaid.
U ong ruh ba ha kine ki arsnem shiteng kum u Myntri, ula iohi ba ki jingtyrwa kam pynroi jong ki MLA ka UDP na ka bynta ki constituency jong ki, kim shym la ioh ia ka jingshimkhia kaba dei hok.
Halor ka khubor kynthih seng, ula ong ba nalor ki 9 ngut ki MLA, ka don ruh ka jingiakren ba arngut ki MLA ki long kiba kloi ban leit iasoh sha kiwei pat ki party.
U Bah Paul ula pynshai ba u khlem don bynta ha ki artylli ki jingialang bala pynlong da ki Kynhun ki bym hun shuh ia ka party bad ong ba u Myntri Bah Lahkmen Rymbui ula pyni kumba u kren na ka bynta kane ka kynhun.
