Shillong, Nailar 27 : U Myntri Rangbah Conrad K Sangma ha ka sngi Palei ula pynphai nia kylla ia ka jingkynnoh u President ka Voice of the People Party (VPP) Ardent Basaiawmoit ba ka Sorkar kala kyntait ban ai song jingiarap ia ki longiing jong ki san ngut ki briew kiba iap ha ka jingjiaha Shillong, haba pynpaw ba ia ka song jingiarap la dep pynlait na ka Chief Minister’s Special Grant (CMSG) khlem da pynmih khubor.
Haba jubab ia ka Zero Hour notice ba wanrah da une u MLA ka Nongkrem, u Conrad ula ong ba ka khubor ba kyntait ban ai ia ka song jingiarap ka dei ka bym dei satia. “Ia ka song jingiarap la dep ban ai sha ki longiing ki lanot ym na ka State Disaster Mitigation Fund (SDMF) hynrei na ka Chief Minister’s Special Grant. Kumta ban ong ba khlem ai ia ka song jingiarap ka dei ka bym dei satia” ong u Conrad hapoh ka Iingdorbar.
Ula batai ia ka song jingiarap hapoh ka SDMF la mang beit thik tang ha ki jingjia pynjulor ka mariang kaba hap hapoh ka State Disaster Response Fund (SDRF) bad kam dei kaba lah ban pyndonkam ha kiwei pat ki jingjia aksiden namar ka jingbatai kyrpang jong ka.
“Hynrei, ka don ka song pisa hapoh ka CMSG. Kam don satia kano kano ka kyndon ba kyrpang namar teng teng ki daw jong ki jingjia ki iapher. U CM u don ia ka hok ban ai ia ka song jingiarap. Hynrei ka long kaba eh bha, namar shisien ba ngi sdang ban kyrshan ia kino kino ki jingjia aksiden, kan kylla long ka rukom bad ka hok lada don ano kano ka jingjia ba kin khmih lynti iaka CMSG”.
U Conrad ula ong ba ka Sorkar ka jied ban leh eiei khlem da hehnia halor jong ka. “Ka nongrim jong ngi ka long kaba shai, kumba ju ong u Myntri ka Tnad Veterinary ha ki jingkren- Ngi trei kham bun ia ka kam, ngi pynduna ia ka jingkren. Ngi la ai ia ka song pisa hynrei ngi khlem pynlong ia ka kum ka khubor kaba heh. Ngi sngewthuh ia ki jingeh jong kine ki longiing bad kane ka jingjia bad kumta ngi lakyrshan ia ki lyngba ka CMSG khlem da heh nia, khlem da pynbna paidbah, khlem da shna ia ki social media reel” ula ong.
“Ngi ngeit ba ki kam jong ngi ki kham kongsan ban ia kaba pynlong khubor na ka. Lehse dei kane ba u dkhot bad ki lad pathai khubor kim shym la tip. Ngim kwah ban pynheh ia ka, ngi la ai jar jar ia ka song jingiarap” bynrap u Myntri Rangbah.
Halor kane, u Bah Ardent ula pynphai nia “Kum u dkhot ba don jingkitkhlieh, ngi la kren ia kane haba pynshong nongrim ia ki khubor ba mih ha ki lad pathai khubor. Kam dei ba ngi kwah ban kren bun bad trei duna”.
 Ardent Basaiawmoit ba ka Sorkar kala kyntait ban ai song jingiarap ia ki longiing jong ki san ngut ki briew kiba iap ha ka jingjiaha Shillong, haba pynpaw ba ia ka song jingiarap la dep pynlait na ka Chief Minister’s Special Grant (CMSG) khlem da pynmih khubor.){kind=link}