SPL-2026 | Khur ka Nangkiew Irat ia ka 3 point ba nyngkong da ka jingjop ia ka Laitkor

Shillong, Nailar 25 : Ka Nangkiew Irat ka la ioh ban khur ia ka jingjop ryngkat bad ka lai point ba nyngkong ha ka Shillong Premier League 2026, bad kane ka la wan da ka jinglah pynliem da 2-0 ia ka Laitkor SC, ha ka jingiakhun ba la long mynta ka sngi.

Ia ki artylli ki kol ka Nangkiew Irat ban khur ia kane ka nam jop ba nyngkong la  thep  da u Ronaldkydon L Nonglait (67’) bad Jefferson Pakyntein (90’+4).

Ha ka jingshisha, ka Laitkor SC ka rung sha kane ka jingiakhun da ka mynsiem ba rhem bha namar ba ka la lah ba kan pynliem noh ia ka Mylliem, kaba naka bynta ka jingiakhun ba mynta ka sngi, ka wanrah ia ki lai tylli ki jingkylla ha ka thup ki rang ialehkai ki jong ka, ha kaba u Samborwell Mynsong, Shaipharlin Nongsiej bad Kitdor Kharphuli ki la wan ban ialehkai naba sdang ha shwa jong u Balajiedlang Lyngwa, Eddisius Kharkongor bad Damutskhem Mawrie.

Haba phai pat sha Nangkiew kaba rung sh kane ka jingiakhun hadien ba ka la lah ba kan iakhaid pyrshah bad ka Nongkseh na ka jingiakhun ba la dep ka don haduh saw tylli ki jingpynkylla ha kaba u Sangti Janai Shianglong, Edyvenson Dhar, Dibinroy Nongspung bad Restom Khriam ki la wan ban mih noh shwa ha ka jaka ka jong u Terry C Khongsti, Yhoto Lohe, Neblejohn Lyngkhoi bad Maxderidoff Wahlang.

Ka kylla step jong ka jingiakhun ka long ki arliang mamla, ki la buh ia ka thong ban ia nion beit shakhmat, kampher ba ki la mihpaw ruh ki sien ia pyrshang ban pynkhih ia ka jar, ki jingpyrshang ba kham paw ha kum kane ka por ki la wan na u Kitdor, u Dibinroy bad u Shelbilkstar Kharshilot ka Nangkiew Irat.

Haba wan ban bteng ia ka kylla miet, marsien ia sdang, ka Nangkiew ka la nang kham pynkhlain ia la ka kynhun da ka jingbulji ia ki player, ha kaba uwei na kiba la ia bujli dei u Yhoto, ha kaba marsien ia rung madan, u la lah ban pynma bha ia ka kut ialehkai ka Laitkor.

Hadien ba la shah tam shakhmat shwa da shi kol, ka Laitkor ka la pyrshang lem ban pyniakhaid, kaba ki jingpyrshang ki jong ka kam shim la poi pat sha ka thong kumba ka la thmu bad ha ka minit ba la pynjlan ia ka por ban pynwai noh artad ia ka jingiakhun, ka Nangkiew ka la ioh ba kan thep pat sa ia ka kol kaba ar kaba long kum u prek ban sah khatduh ia ka Laitkor ban pdiang syndon ia kane ka nam rem.

Lashai ka sngi, ka jingiakhun kan long hapdeng ka Mylliem pyrshah ia ka Mawlai SC, kaban sdang ha ka por 3:40 PM, ha kaba ka Mylliem kan rung sha kane ka jingiakhun hadien ba ka la dep shwa ba kan shah rem ha ki artylli ki jingiakhun ba ka la dep shakhmat .