Shillong, Nailar 25 : Ka Khasi Students’ Union (KSU) kala shim ia ka rai ban pdiang ia ka jingkhot iakren ka Sorkar Jylla halor ki 5 tylli ki mat jingdawa jong ka Seng.
Ia kane ka rai la shim da ka Central Executive Committee (CEC) ka KSU ba shong jingialang kyrkieh hynne ka janmiet sngi Ba-ar.
Kat kum ka kyrwoh na u Information & Publicity Secretary samla Pynshai Kular Dkhar, la pyntip ba kane ka jingiakynduh kan long lashai ka sngi ka 26 tarik Nailar ha ka por 6 baje janmiet.
Ula pynpaw ruh ba ka KSU ka khmih lynti ba kane ka jingiakynduh kan long kaba seisoh.
Ha ka shithi bala phah sha ka KSU ha ka sngi Nyngkong, u Joint Secretary ba khmih ia ka tnad kam Pohiing (Political) DD Syngai la pyntip ba u Myntri Rangbah Conrad K Sangma un pynong ia ka jingialang bad ka KSU ha ka por 6 baje janmiet ha ka 26 tarik Nailar hapoh ka Conference Hall, Meghalaya Secretariat, Main Building.
Ki san tylli ki mat jingdawa ka KSU ki kynthup ia ka jingdawa pynshitom ia u Deputy Commissioner, Superintendent of Police, ki Heh Pulit bad ki nongtrei ka MSPCB namar ka jingkhang ia ki paidbah ban leit iashimbynta ha ka public hearing ka Shree Cement ha East Jaintia Hills ba long ha ka 31 tarik Naitung.
Kiwei pat ki mat dawa ki dei ka jingpyntreikam pura ia ka Meghalaya Residents Safety and Security Act, 2016 haduh ban da pyntreikam ia ka Inner Line Permit, pynieng ia ki facilitation centre ha baroh ki18 tylli ki entry point ha ri-lum Khasi bad Jaintia ryngkat ka jingpynshisha da ki Dorbar Shnong, pyntreikamm ia ka Migrant Workmen Act, 2020 bala pynkylla, pynkylla thymmai ia ka thungkam thungkam ha NEIGRIHMS kynthup ka ratio ba 80:20 ia ki nos kynthei-shynrang, bad ai bhah ia ki trai shnong, bad weng noh ia ki interview ha ka thungkam ia ki kam Grade B,C bad D nalor ban don ka SoP ha baroh ki Recruitment Board.
Lah ban kdew hangne, ba saw ngut ki nongialam ba hakhmat ka KSU kila shah kem ha ki Pulit halor ka jingjia ba jia ha ka rally ka seng ba long ha ka 19 tarik Nailar.
Kine ki saw ngut ki dei u President samla Raymond Kharjana, Vice President samla Pynkmenlang Sanmiet, General Secretary samla Reuben Najiar, bad u Assistant General Secretary Jememiah Pohthmi.
Kine ki Nongialam ka KSU kila don mynta ha Shillong District Jail bad shah set hapoh ka Judicial Custody.
 kala shim ia ka rai ban pdiang ia ka jingkhot iakren ka Sorkar Jylla halor ki 5 tylli ki mat jingdawa jong ka Seng.){kind=link}