Guwahati, August 22: Ka Sorkar Assam bad Meghalaya hynne ka Sngi Saitjain kala pynbna ban shim ia ki lad, kynthup ia ka jingbuh ia ki Helpline kiba kyrpang, ka District-Level Coordination Committee kaba shirta bad ki sienjam ban pynthikna ia ka jingiaid da ka jingshngain ia ki nongjngohkai bad ia ki kali, hadien ba kala mih ka jinghuri hura ha Shillong ha ka 19 tarik u Nailar.
Ia kane la pynbna ha ka jingiakren bad ki nongthoh khubor da u Symbud Myntri Rangbah ka Jylla u Bah Sniawbhalang Dhar bad u Myntri Sorkar ka Assam u Atul Bora hadien ba kala don ka jingialang hapdeng ki nongmihkhmat na ki ar tylli ki sorkar jylla ha Guwahati State Guest House.
Kan don ka kynhun kaban iatreilang hapdeng ki IG, Special Branch, Assam bad u IG, Law and Order, Meghalaya. Ki Helpline kiba kyrpang ka Online Support Forum yn sa pyntreikam noh ban iarap ha kaban lap ia ki riewshimet bad ban ai jingiarap ia ki nongleitkai kiba dang sahkut tad haduh ba ka jinglong jingman kan long noh kaba biang.
U WhatsApp helpline number udei +91-810147888
U Landline Number udei 0361-2381511.
Ki ar tylli ki jylla kila mynjur ban thaw ia ka District-Level Joint Committee kaba shir ta kaban kynthup ia ki Deputy Commissioner bad ki heh ophisar pulit kiba na ki district kiba marjan. Kine ki Committee kin shimkhia man la ka sngi ia kino kino ki mat ha ka thain khappud jong ka Assam-Meghalaya bad kan ialeh ban pynbeit noh mardor.
Sa kawei pat ka Joint Committee kaban kynthup ia ki heh ophisar ka tnad Transport na baroh artylli ki jylla, ki nongmihkhmat na ki synjuk jong ki nongniah kali Tourist yn sa thaw ban pynsuk ia ka leit ka wan jong ki nongjngohkai bad ban iada ia ka bha ka miat ha ka kam jngohkai jongka Assam bad Meghalaya.
Baroh ar ki sorkar jylla kila mynjur ban pynthikna ba kan don ka jingshngain ia ka leit ka wan lyngba u pud u sam u jongki. Kane ka kynthup ia ki kali kiba iaid lyngba ka Barak Valley bad ki bynta ka thain sepngi jong ka Assam sha ki bynta jong ka Meghalaya bad kumjuh ruh ia ki briew kiba na Meghalaya kiba leit sha kylleng ki bynta jong ka jylla Assam.
Ka Sorkar Meghalaya ka iengskhem ba kan shim ia ka jingkitkhlieh ia ka jingshngain bad jingiada ia ki nongjngohkai bad ia ki kali kiba wan rung shapoh ka jylla lyngba ka jylla Assam bad na kiwei kiwei ki bynta jong ka ri.
Ka Sorkar Meghalaya kala pyntip ruh ia ka kynhun na Assam ba ia u President, Vice-President bad General Secretary jongka Khasi Students’ Union (KSU) lah dep ban kem hapoh jong ka Meghalaya Maintenance of Public Order Act.
U Bah Dhar ula ong, ba 15 tylli ki ejahar lah dep ban rejistar ha kaba iadei bad ka jingmih ki kam thombor bad 5 ngut ki briew lah dep ban ithuh kiba donkti ha kitei ki kam thombor, khamtam kiba la thombor ia ki kali kiba don ia u Registration Number ka Assam, lah dep ban kem.
La thaw ruh ia ka Special Investigation Team ban ithuh sa ia kiwei pat kiba donkti bad ban sdang ia ka jingtohkit.
Kine ki ar sorkar kila khmih bniah ruh na ka bynta ka leit ka wan jong ki kali bad ki paitbah kiba dang sahkut.
Katkum ka jingong u Bah Dhar, palat 3,770 tylli ki kali na Assam lah dep ban ai jingiada na jylla Meghalaya ban leit phai sha Assam.
Ki Ophisar kila ong, kiba bun ki briew kiba dang sahkut bad kumba 400 sha ka 500 tylli ki kali kila dep ban jam ia ki bynta kiba kongsan kynthup ia ka thain Umiam. Ka jingpyrshang ka dang iaid shakhmat ban ai jingaida ia ki briew kiba dang sahkut bad ia ki kali ban leit phai sha Assam ha kine ki 48 kynta kiban wan.
